U Symbud Myntri Rangbah ka Jylla u bah Prestone Tynsong mynta ka sngi ka 24 tarik Naitung 2025 u la pyniaid ia ka jingialang bad baroh ki MLA na East Khasi Hills ban ia pyrkhat halor ka jingkiew kaba shyrkhei jong ki nongpang HIV/AIDS ha ka District.
Haba kren sha sha ki lad pathai khubor hadien ba la wai ka jingïalang, ka Myntri ka tnad ka Koit ka Khiah ka Dr. Ampareen Lyngdoh ka la pynpaw ïa ka jingsngewkhia halor kane ka jingkiew stet jong kane ka jingpang bad pynbna ruh ba ka Sorkar Jylla ka la rai ban shim khia ban ïakhun ïa kane ka jingpang.
Ka la bynrap bad pyntip ba ka sorkar kan pynlong ïa ki jingïamir jingmut kiba kum kine ha kylleng ki Distrik ban bishar bniah ïa ka jinglong jingman bad ban thaw ïa ki lad jingïarap kiba ïatreilang.
Ka Myntri ka la pynpaw ba ka East Khasi Hills bad ki bynta jong ka Jaiñtia Hills ki dei napdeng ki thaiñ kiba la shah ktah bha. Tang ha ka thaiñ Khasi Hills ki don 3,432 ngut kiba ioh ia ka jingpang HIV, ha kaba tang 1,581 ngut ki riew shimet kiba wan shakhmat ban wad jingsumar.
