Ka Tourism Commitee kaba hap hapoh ka Hima Sohra mynta ka sngi ka 25 tarik Naitung 2025 ka la wan pyntip paidbah ha Shillong Press Club ha kaba iadei bad ki nongwanjngohkai Pyrthei kiba wan sha ka thaiñ Sohra.
Haba kren bad ki nongthoh khubor u Paiem Maremdor Syiem, Syiem Khynnah ka Hima Sohra, u la pyntip ha kaba iadei bad jingjia kaba la jia dang shen ha kaba ka la don ka jingbret pathar bad ka jingpynjaboh ha ki lynti ki synkieng ha ki thaiñ Sohra.
Ka Hima Sohra ka la pynpaw ia ka jingsngewkhia jur bad ka shim katto katne ki sienjam.
Ka sienjam kaba nyngkong ka long ba ka hima Sohra ka la khang ban ia bam khana, ban ia shet ia tiew, ha ki lynti ki synkien, ha ki rud surok naduh ka thaiñ Mawkdok ter ter haduh Sohra ki thaiñ Mawkma bad haduh Dainthlen bad kiba wan sha kane ka jaka ki dei ban ioh jingbit na ka dorbar shnong, ka dorbar raid ne ka dorbar Hima.
Ka sienjam kaba ar ka dei baroh kiba wan sha Sohra ki dei ban rah ia ki pla thepñuit, baroh la dei ki trai shnong ne kiba na bar baroh ki dei ban don ia ka pla thepñuit ban lait na ka jingbret pathar ia ki ñiut.
Ka sienjam kaba lai, ka Hima Sohra kam shah shuh ia kito ki ba shait sah miet ha ki lum ki wah ne ki kynja campsite kiba la pyniaid da ka Society lane ki shnong ne kino kino ki dorbar shnong.
Ka sienjam kaba saw ki nongjngohkai ki hap ban ialam ia ki Tour Guide, ia kane ka bynta kino kino kiba leit kai sha ki lum ki kwah ne ki lynti kiba hap ban iaid kjat, ki hap kynjoh ktien sha ka Dorbar shnong ne ki Tour Guide bad ki hima ka la buh.
Ka sienjam kaba san ka long ba ka Hima Sohra ka la khang pyrshah ban pynbna ia kino kino ki jaka jngohkai pyrthei bad kane ka bynta ka long kaba kongsan tam khamtam ia ki blogers, ki Social Media ne kino kino kiba pyni pyrthei ia ki jaka jngohkai kiba dang thymmai ban pynbna paidbah khlem da ioh jingbit na ka dorbar Shnong Dorbar raid dorbar Hima.
Kine ki 5 tylli ki kyndon ki dei kiba kongsan bha ban pynsngew bad ki nongjngohkai ki dei ban shimkhia, la shim ia kine ki sienjam ban iada ia ka ioh ka kot ki trai hima na ka kam jngohkai bad khamtam ban ri kyndong ia ka mei mariang.
