Jowai : Ka jingjyllei palat ki nongtuh masi ha kylleng ki jaka khamtam sha ki thaiñ nongkyndong, kala pynlong ia ka Jaiñtia Student Movement (JSM) Unit Mynsngat mynta ka sngi ban shim syndon ia ka jingialang ha ryngkat bad ki paidbah nongshong Shnong ban iakren sani bha halor kumno ban teh lakam ia kane ka jingshah tuh Masi kaba la jia na ka por sha ka por.
Ka jingialang kala shim ia ka rai ba naduh mynta ka sngi 19/8/2021, kila buh ka jingmaham ba tyngeh ia kino kino ki Driver lane ki nongkhaïi kiba kit masi ban iaid lyngba ka shnong Mynsngat naduh ka por 8 baje mynmiet shaneng.
Ha ka juh ka por ka seng ka la dawa ba dei ban ithuh shwa ia uno uno u nong kit Masi, khnang ba kane kan long kum ka lad jingiada na ka jingshah tuh ki masi napoh ka shnong bad kan iarap ia ki nongshong Shnong jong katei ka thaiñ naduh Mynsngat, Khanduli bad ka Hynñiew shnong na ka jingjyllei ki Nongtuh masi.
Halor kane ka seng kala kyrpad jur ia ki paidbah nongshnong shnong ba kin sngewbha iatreilang khnang ban wanrah iaka shongsuk shong shngaiñ bad ban khanglad noh ïa kane ka kam tuh masi napoh ka shnong, la pynkut ka kyrwoh na u General Secretary ka seng u samla Ajidius Sateiñ.