Ka jingjia ba sngewshyrkhei kala jia ha ka shnong Jhalawar jong ka Jylla Rajasthan ha kaba ka tnum jong kawei ka ïingskul Primary kaba la tip kyrteng kum ka Piplod Government School, kala khyllem bad ban ia ki khynnah skul kiba don hapoh ki kamra klas jong katei ka bynta ba hap katei ka tnum, kaba la jia mynta ka step ha ka por kumba 7:45 AM.
Ha kane ka jingjia haduh 35 ngut ki khynnah kila shah ban bad napdeng kine 7 ngut kila khlad noh bad 28 ngut kila mynsaw bad don napdeng kine kiba la mynsaw jur bad la pynkit noh ia ki mar mar sha ki jaka sumar ba marjan.
Kane ka jingjia kala jia katba kitei ki khynnah skul ki dang ieng ban pynlong ia ka jingduwai step la iathuh ki bor Pulit ha ka PTI.
Na ka liang jong ki nongshong shnong kane ka jaka kila pynpaw ia ka jingbitar kaba khraw halor kane ka jingjia. Kila kynnoh ba kane baroh ka jia na ka jingkheiñ sting shaba palat jong ka tnad pyniaid ba kynthup ia ka ophis Sub-Divisional Magistrate, na ka liang jong ki, kila dep ban pyntip la bun sien ia ka jinglong jingman jong katei ka ïing skul kaba la sdang ban tor, hynrei ym don bor sorkar ba treh ban shimkhia ia kane.
Na ka liang jong u District Collector ka Jhalawar ula Ajay Singh dang shen ula dep ban pan ia ki kyrteng jong ki skul sorkar kiba la jot bad tor, hynrei kaba phylla ka long ba kane ka skul kam shym la paw kyrteng ha ka list. Kumta ula ong ba un sa pynlong ia ka jingtohkit bad yn sa pynshitom ia kino kino kiba donkti ha kane ka kam.
