Mynta ka sngi ka Meghalaya Police Department kala pynlong ia ka jingpynkup burom ba kyrpang ia ki ar ngut ki Pulit jong ka kiba la wanrah burom ia ka Department bad kumjuh ia ka Jylla bad ka ri India hi baroh kawei, da kaba iohkhur takma Ksiar ha ka jingiakhun World Police & Fire Games, 2025.
Kine ki ar ngut ki Pulit ki long u bah Alan Marbaniang bad ka kong Wandalin Syiemiong. Kine ki ar ngut kila ioh ban leit iashim bynta ha katei ka lympung ba heh kaba la tip kum ka World Police & Fire Games, 2025 kaba la pynlong ha Birmingham, Alabama jong ka United State.
Ia kane ka jingpynkup burom la leh mynta ka sngi ha U Soso Tham Auditorium ha ka jingdonlang u Deputy Chief Minister bah Prestone Tynsong kum u Kongsan bad u bah Shakliar Warjri Myntri ka Sports & Youth Affairs kum u Symbud Kongsan. La iadon ryngkat ruh da i DGP ka Jylla i kong I. Nonrang, IPS, u Chief Secretary ka Jylla bah DP Wahlang, IAS, ki heh ophisar sorkar bad ki heh Pulit nalor kiwei de.
