“Don ki por ba ka Jylla jong ngi ka shalan 50% u synsar sha kiwei ki Jylla” : Conrad
Ka Sorkar Jylla hapoh ka jingialam jong u Myntri Rangbah Conrad K. Sangma hynne ka sngi ka 25 Naitung, 2025 ka la pynlong ia ka Program ia kaba la tip kum ka “Summit for Rural Empowerment” na ka bynta ban pynshlur bad pynkupbor ia ki nongrep lane ki nongtreikam lajong ha ki thaiñ nongkyndong lyngba ka skhim PM Janjatitya Vikas Mission ia kaba la pynlong ha State Convention, Shillong. Ha kane ka sngi la soi ruh ia ka Soskular (Momerandum of Understanding – MoU) bad 13 tylli ki TECHNICAL & RESEARCH INSTITUTE.
Ka jingthmu jong kane ka program ka long ban pynkylla ia ka rukom treikam kaba thymmai da ka jingpyndonkam ia ki jinghikai kiba yn ioh lyngba kine kynhun ia kiba la dep ban soi soskular bad ruh ban kyntiew ia ka ioh ka kot, ia ki iew sha ki kyrdan kiba heh, kata da ka thong ban rah sha kiwei pat ki Jylla.
Ha kane ka sngi la sam ruh ia ki Cheque sha baroh ki nongtrei kam lajong ha kylleng ka Jylla ia kaba la kot haduh 3.90 klur.
Haba ai jingkren ha kane ka sngi, u Myntri Rangbah u la iathuh ba 55 tylli ki Self Help Group (SHG) la seng ha kine 7 snem ba lah dep. Shuh shuh u la iaroh ba shibun ki jingseisoh la iohi ha kine ki snem. U la ong ruh ba ka jylla jong ngi kadei kaba lah ban pynmih shibun ki kam lyngba ka kam rep bad ngi don ia ka jingsngewthuh ba ki donkam palat ia ka jingkyrshan jong ngi ka Sorkar ha ka por kaba biang. Nalor kata, u Sangma u la iathuh ba katba lah hi lyngba ki tnad ba khmih ia ka kam rep, la ju pynbiang ia ki symbai katba kum ki aiom.
“Ngi dei ka jylla kaba shalan shibun u synsar. La don ki por ba 50% ka Jylla jong ngi ka la pynbiang synsar shabar bad bun ki jylla ki la wan tuid bad na katei ka daw ba u synsar u hiar dor. Na katei ka jingiashem, ngi sngewthuh ba ki nongrep ki donkam ia ka jingkyrshan, kumta ngi la pynlong ia ka program ia kaba la tip kum ka CM Assure. Ngi pyntikna ba ki nongrep kin ym shah khniot ha ka dor jong ki mar”.
Na ka liang jong ka Kong Ampareen Lyngdoh Myntri ba khmih ia ka tnad ka Rep ka Riang ka la ong ba ka PM Janjatitya Vikas Mission kam dei tang ka skhim, hynrei ka dei ka jingpynkupbor ia ki nongshong shnong ha ki thaiñ Nongkyndong. Lyngba kane ka jingiohi kaba thymmai, kata da kaba pyndonkam da ki buit kiba katkum kane ka juk, kan pynkylla dur ia ka rukom im jong ki briew ha kaba ka rep ka riang kan long u budlum jong ka ioh ka kot na ka bynta jong ngi khamtam ia ki briew kiba ha Nongkyndong.
