Ka District Legal Services Authority (DLSA), West Jaiñtia Hills District, Jowai, hapoh ka jingkyrshan jong ka National Legal Services Authority (NALSA) kala pynlong ïa ka prokram ai jinghikai halor ka “NALSA (Legal Services to Persons with Mental Illness and Persons with Intellectual Disabilities) Scheme, 2024” kaba la long mynta ka sngi Thohdieng ha Conference Hall jong ka District and Sessions Court, West Jaiñtia Hills District, Khliehtyrshi.
Ka jingthmu jong kane ka prokram ka long kum shi bynta ban pynsngewthuh halor ka koit ka khiah bad ki lad jingïarap sha kiba duna ka bor jingmut jingpyrkhat kaba ki dei hok ban ïoh ka jingkitkhlieh katkum ka kyndon aiñ jong ka sorkar.
Ha kane ka sngi la wan ban donlang da u kongsan bah H.S Thangkhiew uba dei u Judge High Court ka Meghalaya & Executive Chairman, Meghalaya SLSA, ha ryngkat u District bad Session Judge u N.A Khan kum u Cum Chairman ka District Legal Services Authority, West Jaiñtia Hills, ka District Medical & Health Officer ka Dr. P. Shylla, ki heh ophisar, ki nongïalam shnong, ki muktiar, ki samla pule nalor kiwei de.
U N.A Khan haka jingkren pdiang ula ai khublei ïa baroh kiba la wan ban ïadonlang ha kane ka prokram na ka bynta ban ai jingtip ïa ki nongshong shnong halor ki kyndon aiñ bad ki lad jingsumar ïa ka koit ka khiah jong ki. Shuh shuh ula pynsngew halor ka jingdonkam jong ka NALSA scheme kaba ai jingïarap sha baroh kiba shah ktah ha bor pyrkhat.
Ula ong kane ka skim ka bthah ïa ka District Legal Service Authorities (DLSAs) ban pynshisha ïa ki briew kiba dei hok ban ïoh ïaka khamtam ïa kito ki briew kiba don ha ki along, ha ki jaka sumar bad ha ki jaka ri khunswet.
Katba na ka liang u H.S Thangkhiew ula pynsngew halor ka aiñ jong ka Ri kaba ïadei bad ka Mental Healthcare Act, 2017 kaba ai ka jingïada ïa ki briew kiba don jingduna haka bor pyrkhat, da kaba ong ka jingkyrduh, ka jingngop ha ki jingdih, ka jingbymdon ïa ki ïing ki sem bad ka jingbym ïasngewthuh jingmut ha ïing kala long ka daw bah jong ka jingsniew.
Ha kane ka sngi la ai jinghikai ha kiba bun ki bynta kiba ïadei bad ka jingkoit jingkhiah bad ki lad jingïarap kiba lah ban ïoh na ka sorkar jylla bad na ka District kumjuh.
Na ka liang ki riew shemphang kiba la wan ban ai jinghikai ki kynthup ïa Dr. Dazelle Sungoh, Senior Residence Psychiatrist, Department of Psychiatry, NEIGRIHMS, ka Kimberly Syiem, Clinical Psychologist Department of Psychiatry, NEIGRIHMS, Dr. E. Dann, District Mental and Health Programme Officer, Jowai bad ka kong Y. Najiar, District Social Welfare Officer, Jowai.
