U MLA ka 2-Jowai Constituency ma Wailadmiki Shylla mynta ka sngi saitjaiñ ula plie paidbah ïa kawei na ki jaka sah bad jaka bam ïa kaba la tip kum ka ‘Yutran Inn’ kaba don ha Ladthalaboh mar pyrshah ka Fishery ophis West Jaiñtia Hills District.
Kane ka ‘Yutran Inn’ ka ba dei trai da ka kong Emika Biam ka long kaba la biang lut nadong shadong ki jingdonkam jong ki nongwan sah naduh ki jaka thiah, ki jaka shongkai, ki kamram shongkai, ki kamra sum, ki jaka bam bad kiwei de ki jingdonkam jong ki nongwan sah bad kadon ruh ïa ka jaka pynïeng kali (parking).
Hashwa ban plie paidbah ïa ka la don ka jingïalang ba lyngkot ba la pynïaid da u ma Soomeyoo SNS Sayoo ha ka jingïadonlang ki trai jong kane ka ‘Yutran Inn’, ryngkat u Waheh Shnong la Ladthadlaboh ma L. D. Lakiang, ki MDC bad kiwei de kiba la shah khot sngewbha.
U kongsam ma Wailadmiki Shylla ula ai ka jingïaroh ïa ki trai jong kane ka ‘Yutran Inn’ kiba la shim ïa kane ka bynta khang ba ka long ruh kum ka nuksa ïa kiwei de. U ong ba ka jingdon kum kane ka jaka kan ïarap bad pynsuk ïa ki nongwan jngohkai pyrthei ba kin ïoh jaka sah kum kane ka ïing kaba la biang lut bad kaba shngaiñ namar ka don hapdeng jong ka sor. Lyngba ka jingdon kum kine ki Hotel ka long ruh kum ka lad ban plie kam plie jam ban ym shaniah tang ha ki kam sorkar.
U kyrmen ba kane ka ‘Yutran Inn’ kan kiew shaphrang ha ka jingshakri ym tang hapoh ka District hynrei kan nang pyiar sha kiwei de ki District na ka bynta ban ai jingmyntoi ïa ki paidbah, ula ong ruh wat na ka liang ka sorkar ruh ka ai jingïarap pisa ryngkat ka subsidy ia kino kino kiba kwah ban seng kum kine ki jaitkam.
Kiwei de kiba ai jingkren ki kynthup ïa u ma L. D. Lakiang, u MDC ba shusieh ma O. Lamin, MDC ka Jowai North ma Brightstar Chyrmang bad kiwei de, katba ïa ka kyntien ai khublei la ïoh na u ma Dawan Biam bad hashwa ban ot ïa u Ribon da u kongsan la don ka jingduwai na u bah Mark Rymbai.
