Ka Hynniewtrep Youths’ Council (HYC) hynne ka sngi, ka 25 tarik Naitung 2025, ka la leit ia kynduh ia ka myntri ka tnad ka koit ka khiah ka Dr Ampareen Lyngdoh, ban pynsngew haba iadei bad ka jingkynduh jingeh ki paidbah halor ka koit ka khiah.
Haba kren bad ki nongthoh khubor u President ka HYC u Bah Roy Kupar Synrem u la ong katkum ka jingtip ba la ioh na ka ophis jong ka Directorate of Health Services (MI), u la ong ba ki jaka sumar kum ki CHC, PHC bad Sub-centre ha Khasi bad Jaintia Hills ki duna palat ki doctor ki nurse bad kiwei ki nongtrei ha kitei ki jaka sumar.
U la bynrap ki post kiba la ai jingbit da ka Sorkar ki dang sah thylli haduh mynta – kumba 8 ngut ki Medical Officer, 7 ngut ki Specialist, 10 ngut ki paramedical staff bad 100 ngut ki nurse bad kiwei ki nongtrei bad kane ka pynlong ia ka jingdkoh treikam bad mad jingeh ki paidbah ha ki jaka sumar.
Shuh shuh u la ong ka Sorkar ka dei ban leh da ka rai kaba tyngeh ïa ki samla pule MBBS kiba la sponsor da ka Jylla, hynrei kim shym la wan shakri ha ki jaka nongkyndong katkum ka ba la soi.
Shuh shuh u la ong katkum ka RTI, naduh 2015-2016 haduh 2019-2020, don 359 ngut ki samla kiba la ioh sponsor, hynrei 96 ngut kim shym la wan trei biang ha ka Sorkar. Ka HYC ka dawa ba kin siew lut ïa ka bai pule bad ka dor kaba Sorkar ka la pyndonkam, bad ba yn pynkiew noh ïa ka bond sha ka 1 klur na ka snem pule 2026-2027 bad pynlong ban shakri 5 snem ha ki nongkyndong.
Shuh shuh, ka HYC ka dawa ruh ban tei noh da ki Dialysis Unit ha ki Hospital Sorkar bad ki CHC ha baroh ka Khasi-Jaintia Hills, namar ka jingkiew jong ki nongpang Kidney.
Ka seng ka kdew ba naduh u Lber 2018 haduh Nailur 2024, haduh 3038 ngut ki nongpang Kidney ha NEIGRIHMS bad Civil Hospital, Shillong.
Ka HYC ka la pynpaw haba iadei bad kiwei pat ki mat kiba donkam ka jingshim khia kum ban pynbiang Doctor noh ha Umden PHC, Ri Bhoi District bad ban pynlong noh ka AYUSH Dispensary ha Saikarap (Shella-Bholaganj) ban trei hok, ban kyntiew kyrdan noh ïa ki Sub-Centre bad PHC sha ka CHC katkum ka donkam.
Na ka liang ka Myntri ka tnad ka koit ka khiah ka la pyntip sha ka seng ba kan shimkhia haba iadei bad kane ka jingdawa jong ka seng.
Khatduh na ka liang ka Seng kan iai buddien ia kine ki mat kiba la pynsngew sha ka sorkar.
