Ki nongialam jong ka Khasi Student Union (KSU), West Jaiñtia Hills District Unit, ryngkat bad ka KSU Lapangap Unit, hapoh ka jingialam jong u samla Laitphar Syngkrem President KSU-WJHDU, samla Leningard Tariang General Secretary KSU-WJHDU bad u samla S. Sumer President Lapangap Unit, mynta ka sngi 28.07.2025, ki la leit aiti da ka jingthoh ha u Superintendent of Police West Jaiñtia Hills District u J S Dhanoa IPS, halor ka jingbteng jong ka jingshah pyndik ki nongrep ka thaiñ Lapangap na ka por sha ka ha ki nong Karbi, ban kyntu ia u SP ban buh ne phah ia ki pulit pahara ha katei ka thaiñ.
Na ka liang ki nongialam ka KSU, haba kren sha ki lad pathai khubor, ki la ong ba ka jingiakyduh ia u SP ka West Jaintia, ka long ban ai ka jingiada na ka bynta ki nongrep jong ka shnong Lapangap, ha kaba ki Karbi ki la pyndonkam da ki khnam ki ryntieh bad ki jri ban siat sha ki nongrep jong ka Lapangap, kaba la jia naduh ka 25 u bnai June 2025.
Ka seng ka pynpaw ruh ka jingsngewsih halor kane ka jingshah pyndik jong ki nongrep ka jylla ha ki nong Karbi, haba ki leit ban rep ban riang sha ki jaka rep ki jong ki. Ha kaba dang ha kane ka sngi Saitjain la don ka jingsiat jri na ka liang ki nong Karbi bad sa kawei ruh ki Karbi ki juh jynrat ne phut ia ki jingrep jingriang jong ki nongrep Lapangap.
Ki la ong ruh ba haduh mynta na ka liang ki briew jong ka Lapangap kim juh sdang ne leh ia kano kano ka jingia khajia, la iathuh ruh ba ki nong Tahpat jong ka Karbi kiba la shait pynmih ki jinghuri hura na ka por sha ka por. Ka KSU ka la dawa ruh ia ki briew jong ka shong Tahpat ba kin sangeh ia kane ka kam pyndik pynthut ka jong ki bad lada kim sangeh ka seng ruh kan wad da kiwei ki lad.
Kumta na ka liang ka KSU ka buh ka jingkyrpat ia baroh ar ki sorkar jong ka Jylla Assam bad Meghalaya ban pynsangeh noh ia kane ka jingia khajia kaba la jia na ka por sha ka por naduh ki por kiba mynshwa.
Na ka liang ka KSU ka ha kane ka sngi Thodieng 25 tarik, ki la iakynduh ruh ia ki nongrep ka Lapangap bad wan lad wan lynti halor kane ka kam.
Ha ka jingiadei bad ka jingiakren bad u SP, na ka liang ka KSU ka la ong ba u SP ruh u don ka jingsngewkhia halor kane ka kam bad na ka liang jong u ruh, un wan ki lad ki lynti ban pynkloi noh ban buh ia ki pulit sha katei ka jaka khnang ba ki briew jong ka thaiñ Lapangap bad ki shnong ba marjan kin ioh ia ka jingshngaiñ.
