Ka ophis jong ka District Mission Coordinator, SSA ha ryngkat ka District School Education Officer bad ka District Project Coordinator (RMSA), West Jaiñtia Hills, mynta ka sngi (29/07/2025) kala leh rakhe ïa ka jingdap 5 snem ka jingïaid lynti jong ka National Education Policy (NEP) 2020, da kaba pynlong ïa ka jingïakynduh lang ba kyrpang ha Inclusive Education Resource Centre, Mihmyntdu, haka jingdonlang ka kong C. Lyngdoh, BMC-Thadlaskeiñ Block bad ka D. Lathong, BMC-Laskeiñ Block.
Ha kane ka prokram ïakynduhlang la wan ban ïashim bynta da ki khynnah kiba donkam ban ïohjingïarap kyrpang (CWSN) kiba dei napoh ka Thadlaskeiñ bad ka Laskeiñ Block, katba na ka bynta ka Amlarem Block ïa kane ka prokram la dep ban pynlong ha ka 24 tarik u Naitung, 2025.
Kane ka dei ka prokram kaba wan lyngba ka Akhil Bharatiya Shiksha Samagam (ABSS) 2025 ha ka thong jong ka 5th Anniversary of National Education Policy (NEP) 2020, Distribution of Aids & Appliances for Children with Special Needs (CWSN).
Ha ka jingïalang ba lyngkot mynta ka sngi la pynïaid da ka R. Plain, IE Volunteers Laskeiñ Block, la ïoh ka jingkren lam khmat halor jong kane ka prokram da u L.K. Singh, IE Coordinator SSA, West Jaiñtia Hills bad ka jingren aimynsiem na ka kong C. Lyngdoh, BMC-Thadlaskeiñ Block sha ki kmie, ki kpa jong ki khun kiba don ka jinglong kyrpang.
Shuh shuh ka kong C. Lyngdoh kala pynpaw ka jingsngewnguh bad sngewburom ïa ki longkmie bad ki longkpa kiba la shim ka jingkitkhlieh, na ka bynta ki khun ki kti jong ki kiba donkam shisha ban ïoh ka jingïarap ba kyrpang. Ka kong C.Lyngdoh kala pynsngew ba ka sorkar ka don ïa ka thong ban kyntiew ïa ka pule ka puthi jong kine ki khynnah. Na ka liang jong ka ruh kala pyrshang ban wad ki lad ki lynti ban leh ïa kaba bha tam na ka bynta kitei ki khynnah, haka juh ka por ka khot lang ïa ki kmie ki kpa ban ïatreilang na ka por sha ka por.
Haba pynkut ka buh ka jingkyntulang ïa ki longkmie bad ki longkpa ba kin pyndonkam hok ïa kitei ki tiar kiba la sam mynta ka sngi, khnang ba kan long ka jingmyntoi ïa ki khun jong ki ym ban pyndonkam bakla ïa ki.
