Ki Nongialam Shnong jong ka Shnong Bataw hynne ka sngi ka 29 tarik Naitung 2025 ki la wan ha Shillong Press Club ha kaba ia dei bad ka jingiakajia knieh jaka bad ka shnong Pynurkba, East Jaintia Hills.
Haba kren sha ki lad pathai khubor u Waheh Shnong jong ka Shnong Bataw u Bah Deihok Sumer u la pynpaw ka Shnong ka thrang ban pynshai halor ka jingkynnoh jong ka Shnong Pynurkba ba ka shnong ka wan rah tiar pynmynsaw bad pyntieng pynsmiej haduh na u wei na ki Nongshong Shnong u la kem pang.
U Waheh Shnong ka Bataw u pynrem jur ia ka jingkynnoh ban pynbudnam namar ka Shnong ka don tang ka wei ka jingmut kata ka long ban pynsangeh ia ka jingwan kyntur pud jong ka Shnong Pynurkba bad ka jingwantrei sha u pud u sam jong ka Shnong. Ka Shnong Bataw ka kren da ka burom ka akor ia kito ki paidbah ym kumba la kynnoh.
U bah Sumer u la iathuh ba ka shnong ka la long trai ia kane ka jaka naduh ka 4 tarik u December 2008 bad ki la longtrai ia kane ka jaka lyngba ka kot kaba ki la ioh na ka ophis jong ka JHADC.
Shuh shuh u la iathuh ba ka don ka jingïalang paidbah ha kaba la iadon lang u local MDC u Dr Sanky Shangpung ha kaba ka la don la jingai jingmut na ka liang u MDC ruh ba ia kane ka jaka dei ban pynbeit noh namar ki ia dei ki para marjan Shnong.
U Bah Sumer u la pynpaw ba ka Shnong ka la buh da ka jingthoh sha u CFO ban pynpaw ia ka jingpyrshah hynrei kim shym la sngap bad ka survey ka la iaid sha khmat, wat la ka Shnong ka buh ia ka shithi pyrshah hynrei ka ophis u CFO ka la pyllait kot khlem ka jingtip jong ka Shnong.
U la ong ruh ba wat la ka Shnong Pynurkba ka kyntait ban iakren bad ka Shnong Bataw haba ia dei bad kane ka jaka ka Shnong ka pyni ba ka kam trai ia kane ka jaka.
