Mynta ka sngi ka 31 tarik u bnai July 2025 u Bah Reachingson Siangshai u la leit biang ban buh da ka RTI ha ka office u DC ka EJHD ha ka jingiadei bad ka DSC kaba la pynlong ha kane District ha ki bnai ba lah leit noh.
Kum ban pynshukynmaw ba ha ka sien kaba nyngkong eh u bah Siangshai u la buh ïa ka RTI ka long hadien ba ki nongthep kam ki la ujor sha u ba ka rukom thep kam hapoh kane ka District kam long kaba shai bad na ka liang ka jong u, u la shim ia ka sienjam ban leit buh da ka RTI ban ïoh ïa ki jubab.
Ka RTI kaba u bah Siangshai u lah dep ban buh ha ka Office u DC ka EJHD ka long ha ka 16 tarik u bnai May 2025, ha ka 9 tarik u bnai July 2025 bad ha ka 31 tarik mynta u bnai July 2025.
Ha ka 25 u bnai June 2025 u Bah Siangshai u la ïoh ia ka jubab lyngba ka RTI bad kane kam pat pynhun ia u namar katkum ka jingtip ka jong u, u ong ba ha ka kam Sectional Assistant ki don tang 2 tylli ki post hynrei haba pynmih pat ïa ka Results ki don haduh 3 ngut kiba ïoh.
Ha ka 9 tarik u bnai July 2025 u bah Siangshai u la leit biang ban buh ïa ka RTI ha ka jingiadei pat bad ki marks ha kaba na ka liang ka jong u, u ong ba um pat ïoh ïa ka jingshai kaba pura na ka bynta ki marks jong kiba iakhun ia kane ka kam DSC hapoh ka District bad ia kane ka RTI kaba u lah dep ban leit buh ha ka 9 tarik u bnai July 2025 u ong ba haduh mynta um pat ïoh ïa ka Jubab.
Ha ka 31 tarik u bnai July 2025 u bah Siangshai u la leit biang ban buh ia ka RTI ha ka jingiadei pat bad ki kor CCTV Video recording bad kiwei kiwei de ki tiar donkam ban pynkhreh ha ka rukom thung kam thung jam hapoh ka District la ki pyndonkam ne em da kine ki kor ha por ba pynlong ia examination kum ka Written Test, Typing Test, Physical Test, Language Test bad ka Driving test bad kiwei kiwei de ki jingkylli ha kaba iadei bad ka rukom Pynïaid ha ka por ba ki thung kam hapoh kane ka District.
