U Myntri ka Sorkar pdeng ba peit ia ka tnad ka rep ka riang u Shivraj Singh Chauhan mynta ka sngi ka 1 tarik Nailar 2025 u la plie paidbah ia ka Tamasa Sohtrun kaba lai ha Dilli Hat New Delhi.
Ha kane ka sngi la ia don lang u Myntri Rangbah ka Jylla u Conrad K Sangma, ki ophisar jong ka sorkar india bad kumjuh ki ophisar jong ka sorkar jylla kumjuh ka jingiadonlang ki nongrep sohtrun na ka jylla.
Haba kren ha kane ka sngi na ka liang u Myntri ka sorkar pdeng ba peit ia ka tnad ka rep ka riang u Shivraj Singh Chauhan u la ong ba ki mar rep napoh jylla Meghalaya ki long kiba khlem dawai, ban pyniaid iew ia kine ki mar rep bad ka jingpynlong ia ka tamasa Sohtrun ha ka sien kaba lai ka pyni ba ka jylla Meghalaya ka long kaba kyrpang haba iadei bad ka rep ka riang.
U la ai khublei ia ka sorkar Meghalaya khamtam ia u Myntri Rangbah u Conrad K Sangma uba la trei shitom ban pynlong ia kane ka tamasa Sohtrun. U la pynpaw ha u Myntri Rangbah ba ka sorkar India ka don ha syndah bad ka sorkar Meghalaya haba iadei bad kino kino ki jingdonkam haba iadei bad ka rep ka riang.
Shuh shuh u la kyntu ia ki paidbah ka thaiñ Delhi ban wan jngoh ia kane ka tamasa Sohtrun bad kumjuh ban wan mad ia u Sohtrun uba ka jylla Meghalaya kaba pynmih uba bang bad uba thiang tam.
Ha kane ka sngi ka la don ruh ka jingiasoi MOA ka sorkar jylla bad 3 tylli ki company kata ka Reliance Fresh, Amazon Karigar, bad ka Blue Tokai Coffee, na ka bynta ban pyniar bad pynheh shuh shuh ban kyntiew ia ki mar rep kiba mih na ka jylla bad kine ki lai tylli ki company.
Na ka liang u Myntri Rangbah ka Sorkar Jylla u Conrad K Sangma haba ai jingkren ha kane ka sngi u la pynpaw kane ka dei ka sien kaba lai haba iadei bad ka jingpynlong ia kane ka tamasa Sohtrun bad pynpaw ia ka jingkmen namar man u snem kane ka tamasa ka dang kiew bad iai kiew bha namar ki nongrep ka jylla ki ioh jingmyntoi bad iadei bad ka jingpynlong ia kane ka tamasa Sohtrun bad ki nongrep ki dei hok ban ioh.
Shuh shuh u la ong ka jylla ka pynmih 1.5 lakh metric tone u Sohtrun man la u snem bad kane ka jingpynmih ia u Sohtrun ka kynthup tang ba shalan ha ki thaiñ North East.
U la bynrap ka jylla ka la shna ki jaka ban buh ia ki mar rep ym tang u sohtrun hynrei kiwei ki jait mar rep kum u Sohmarit, Shynrai bad kiwei kiwei ki mar rep na ka bynta ban kyntiew bad shalan sha kylleng ki ri bad ki pyrthei haba iadei bad ki mar rep ka jylla, u la pyntip ka jingthmu jong ka sorkar ka long ban seng kawei ka unit ha man la ki block kiba don ha ka jylla na ka bynta ban pynmih bad kyntiew ia ki jingdawa haba iadei bad ki mar rep.
Shuh shuh u la ong haba iadei bad ka jingsoi ia ka MoU bad kine ki lai tylli ki company ka ba kynthup ia ka Reliance, ka Amazon bad bad Blue Coffee ka long kum shibynta ban kyrshan bad iarap ia ki nongrep ban shalan ia ki marep sha kylleng ka pyrthei bad kane kam dei tang ia ka jylla marwei hynrei ka jylla ka kwah ban pynmih da ki mar rep kiba dang thymmai bad kiba khuid, na ki thain NorthEast ne na ki jylla shatei lam mihngi bad sha kylleng ka pyrthei.
