Bun kiba ot 10 na ka 100 kilo
Tang hadien shi taiew ba ki nongrep ki la leit ban tur sha Secretariat na ka bynta ban kynduh ia ka Myntri ba khmih ia ka Kam rep ha ka Jylla, Kong Ampareen Lyngdoh, hynne ka sngi ka 1 tarik Nailar 2025, u Chief Executive Member (CEM) ka KHADC ryngkat bad katto katne ki dkot ka EC ki la leit ban sngap ban tynjuh hi da lade halor ka jingioh khubor ba thurmur ka rukom ot kilo ia ki jhur ha Iewduh, Shillong.
Katkum ka jingiakhih jong ka seng ki nongrep ha kane taiew ba lah dep, ka long ban pynduh noh ia ka jingot kilo ia baroh ki jait jhur bad halor ka mat ha kaba iadei bad ka jinghiar dor ki mar rep.
Haba ioh ban kylli jingkylli bad sngap ia ka jubab na ki nongrep, ki nongdie bad ki nongthied, la lap ba bun ki jingot kilo ki long thurmur. Don katto katne kiba la iathuh ba na ka 100 kilo la ot 10 kilo don pat ki jait jhur kiba la kham ot bun namar ki dei kiba kham pyut kloi. Na ka liang ki nongshong ïew, ki la iathuh ba ym lah ban kiar ka jingot kilo ka hap beit ban pyntreikam namar ki don ki jhur kiba pyut lypa bad haba die sha ki nongthied ym lah ban thew ksiar, kumta lada tam ka jingthew ha man ki kilo kan wanrah ia ka jingduhnong lada ym iohlad ban ot kilo lypa na ki trai.
Kaba kham sngewlyngngoh kane ka jingot kilo ka long ba ka treikam tang para Khasi, ha kaba ki la iathuh ba ki Bar jylla kim ju shah ban ot kilo lada shim mar na ki bad lada jia ba ki jhur ki pyut ka jingduh nong ka long ka jong ki.
Hadien ba la ioh ban bishar ia kane ka bynta, ki dkot ka EC ki la iathuh ba ia kane ka mat yn hap ban bishar bniah bad ia mynta ym pat lah ban rai kyrkieh, kata la yn weng ne buh ia kane ka ain ban ot kilo ia ki jhur.
Na ka liang u Bah Powell Sohkhlet (EM) u la iathuh ba kane ka ain ban ot kilo ka la don lypa mynshwa ia kaba ka EC barim ka la dep ban shna hynrei kane ka la poi mynta ha ka kti jong ka Sorkar jylla bad ia ka rai ba khatduh kan shong ha ka Sorkar la ka sngewdei ne em ban pyntreikam ia kane ka ain.
