Ka Seng Kur Dkhar, EJHD Unit ha ka 2 tarik u bnai Nailar 2025 ka la khot lane summon ïa uwei u khar Nepali uba kam ïalade ba u dei na ka jait kur Dkhar bad kane ka la pynlyngoh ïa ka Seng Kur Dkhar baroh kawei ba kumno u dakhar uba wan ban shong ban sah sha ka Jylla Meghalaya u la īoh ban kam Trai wat ïa ka kur ka jait jong kiwei pat.
Haba u nonglum khubor u la ïoh ban ïakren bad utei u dakhar Nepali ba kumno u lah ban pynrung lane pynïoh ïalade syndon da ka kur jong kiwei pat u la phla ba u Waheh Shnong ka Shnong Umsatai, East Jaiñtia Hills District u Lieh Lyngdoh uba la khlad noh mynta, ha ka por ba u dang long kum u Waheh Shnong u la pynrung ïa kane ka Kur jong une u Nepali sha ka kur Dkhar.
Haba ïoh ban buh ïa ka jingkylli na une u Nepali ia ka kyrteng trai jong u, u ong ba ka Kyrteng trai ka jong u ka long u Jete Thymbo bad la pynkylla noh ïa kane ka kyrteng sha u Lyngka Dkhar kaba kham phylla shuh shuh ka long ba une u Nepali ym ba u ïoh tang ïa ka jait kur Dkhar ïalade hynrei wat ïa u kpa u jong u ruh la pynkylla sha ka Kur Lyngdoh.
Na ka liang ka Lok jong une u Nepali ka la iathuh ba kam tip ei ei ruh em shaphang kane la ki ïaid ne em ha ka lynti kaba dei bad na ka daw ba kim dei ki briew kiba lah nang lah stad la pynrung ïa ka kyrteng bad ka kur jong u lok jong ka sha ka kur Dkhar bad ha shwa ïa kane ruh na ka liang ka jong ka, ka ong ba ki khlem ai ktien sha ka Kur Dkhar ban ïoh ban pynrung ïa u lok jong ka sha ka kur Dkhar.
Na ka liang u Vice President Ka Seng Kur Dkhar, EJHDU u Bah Shaniah Skem Dkhar haba kren sha ki lad pathai khubor u ong ba na ka liang ka Kur ka la maham tyngeh ruh ïa kino kino ki Waheh Shnong ba nangne sha khmat ha shwa ba kin ai ïa ki kot ki sla sha ki bar jylla ki dei ban peit bniah bad ban wad bniah ia ka tynrai ha shwa ba kin ai ïa kino kino ki kot ki sla khamtam sha ki bar jylla. Na ka liang ka Seng Kur Dkhar ka la ai por tang hapoh 3 bnai ïa une u dakhar bad ka lok ka jong u ba kin pynbeit ïa kane ka Kur bad weng noh syndon na ka jingkam ba u dei na ka jait Kur Dkhar.
