Ka Behdeiñkhlam Joint Committee, jong ki hynriew tylli ki Seiñ Raij, kila ai ia ka jingpyntip paidbah lyngba ki lad pathai khubor mynta ka sngi Saitjain 2.8.2025, ki la ong ba ki la khot sngewbha ia u Dr Sukanta Majumdar, myntri sorkar pdeng jong ka kam pynroi ka thaiñ shatei lam mihngi ban long kum u kongsan ha ka lehniam shad Behdeiñkhlam jong ka Seiñ Raij Mukhla ha ka 31 August 2025.
U ma Phrangki Pale, Convener ka Behdeiñkhlam Joint Committee, u la ong ba “Kane kan long ka sien kaba nyngkong ba u myntri sorkar pdeng un sakhi ïa ka shad Behdeiñkhlam ha ki thaiñ nongkyndong.
Ka long ruh ka jingsngew sarong lang na ka bynta ki hynriew tylli ki Seiñ Raij hapoh Ri Lum Jaintia kiba kynthup ia ka Mukhla, lalong, Tuber, Muthlong, Sohkymphor bad Chyrmang ba u Myntri Sorkar ba la kdew haneng u la pdiang ïa ka jingkhot jong ki ban wan sakhi ïa ka shad Behdeiñkhlam ka Seiñ Raij Mukhla kum u Kongsan.
Ka jingwan jong u myntri sorkar pdeng sha ka shad Behdeiñkhlam kan don ka jingkyrkhu namar ha kaba pyni ia ka tamasa jong ki sha ka ri India baroh kawei bad khamtam eh sha ki paidbah ka West Bengal, namar ba une u nongialam un don shibun ki nongbud na la ka jong ka jylla. Na ka liang ki dkhot ka Committee ki kyrmen ba ki nongjngohkai pyrthei na West Bengal khamtam kin wan bun sha kine ki tamasa Behdeiñkhlam hapoh ka jylla Meghalaya.
Ki la ong ruh ba naduh u snem ban wan, ka Committee kan sa pynphriang ia ka Calendar jong ki Tamasa jong ka jaitbynriew Jaintia ban iarap ia ki nongjngohkai pyrthei kiba thmu ia ka jingleit shuti jong ki sha Meghalaya ha ka por tamasa.
Shuh shuh ka Committee ka kyrpad ïa ki bor pynïaid District, ka tnad Pulit bad kiwei ki tnad Sorkar ba kin ai ka jingkyrshan ïa kine ki tamasa ha la ka jong ka jong ka nynta. Ha kajuh ka por la kyrpad ia ki nongshong shnong ka jylla bad kiwei ba kin sakhi ia kane ka lehniam Behdeiñkhlam khlem da kheiñ jingiapher ia ka niam ka rukom, ka jait ne ka jingngeit.
Khatduh eh, ki pyntip ruh ba ki la buh ruh ka kyrpad ïa u MOS ban plie ïa ki Cultural Infrastructure jong ki hynriew tylli ki Sein Raij, ïa kaba la ai da ka North Eastern Council, Ministry of Development jong ka thaiñ shatei lammihngi ha kaba kot haduh 1.93 klur tyngka.
Shuh shuh ki la pyntip ruh ba ki Lehniam Shad Behdeiñkhlam kiba ban sa long ki dei jong ka Seiñ Raij Ialong ka ban long ha ka 07.08.2025 tarik, Seiñ Raij Muthlong ha ka 08.08.2025 tarik, Seiñ Raij Sohkymphor ha ka 16.08.2025 bad Seiñ Raij Mukhla ka ban long ha ka 31.08.2025.
