Mynta ka sngi (3.8.2025) kaba dei ka sngi pynkut ia ka tamasa Sohtrun ba lai sngi lynter ha nongbah New Delhi la wanrah haduh 15.4 MT u sohtrun napoh ka jylla Meghalaya bad la pynpoi ha ka tamasa pynïaid ïew ïa u Sohtrun kaba la pynlong ha Dilli Hatt INA New Delhi, kaba la sdang naduh ka 1 tarik.
U M.D Shadap uba dei u Director of Food Processing jong ka sorkar jylla ha ka jingkren sha ki lad pathai khubor mynta ka sngi pynkut ïa ka tamasa ula pynsngew ba ka jingdawa ïa u sohtrun napoh ka jylla Meghalaya kala long kaba jur bha ha kine ki lai sngi lynter jong ka tamasa.
Ula ong ka jingdawa ïa u sohtrun ha kane ka sien kaba lai jong ka tamasa kala poi sha ka 15 ton tam bad tang hapoh 3 baje janmiet u sohtrun uba wanrah sha kane ka tamasa ula lut kloi na ka daw ka jingwan thied jong ki paidbah na kylleng ki jaka jong ka Nongbah Delhi bad kiba nabar kumjuh.
Namar ka jingdawa jur palat ïa u sohtrun ki paidbha kiba kwah ban thied ki lah ban leh da ka online na ki kompani kiba la dep ban ïasoi bad ka sorkar haka sngi ba sdang ïa ka tamasa, ong u ma Shadap.
Kumba long mynta u ong ba ka jylla ka don ïa ka jaka rep haduh 12 hajar hectare bad ka jingpynmih ïa u sohtrun ka long haduh 1 lak 50 hajar ton ha ka shisnem, katba ïa ki nongrep kiba la wanlam sha kane ka jaka ki dei na ki ar tylli ki jaka kiba pynmih bun eh ïa une u jait mar rep kata na Ri-Bhoi bad West Garo Hill.
Hapoh kine ki lai sngi “Ngi la pyrshang ban teh lakam bah ïa ka rukom die ïa u sohtrun namar ka jingdawa palat na ki paidbah na ka daw ka jingbam, ka jingshngiam bad ka jingthiang jong u sohtrun kaba la khring ïa kiba buh balang.
La wan ban pynshong shit shuh shuh ha kane ka tamasa da ki kynhun rwai ba paw na ka jylla kiba kynthup ïa ka The Lynx, Skubo Project, Elena Sohktung & the band bad ka hegim Durama. Baroh ki stall kiba don ha kane ka tamasa ki don haduh 30 tylli kiba die ruh ia kiwe de ki jait mar bala wanran napoh ka jylla Meghalaya.
