Ka ophis jong ka District Medical & Health Officer (DM&HO), East Jaintia Ka Hills District mynta ka sngi ka la rakhe ia ka taiew “World Breastfeeding Week 2025” halor ka phang “Invest in Breastfeeding, Invest in the future” bad ka sngi jong ka jingbun briew ha ka pyrthei 2025 halor ka phang “ Healthy Timing & Spacing Between Pregnancies for Planned Parenthood” ha ka prokram ba la pynlong ha ka Conference Hall jong ka Khliehriat Civil Hospital, Khliehriat.
Ha kane ka prokram la wan ïashim bynta da u DM&HO ka East Jaintia Hills District, u Dr. D Shylla, ka Dr. N.P Suchiang, Dr H. R.M Lamare, u District Programme Manager ka NHM u ma A. Dhar, ka Community Health Officer (CHO), Khliehriat Civil Hospital ka kong R. Dhar, ki ASHA bad kiwei kiwei ki nongtrei ka koit ka khiah.
Ha ka jingkren u Dr. D. Shylla u la pynpaw ïa ka jingdonkam bad ka jingpynkynmaw ia kiba don bynta ban kynmaw ba ka jingaibuiñ (dud) jong ka kmie ka iarap shibun ban pynioh ka jingkoit jingkhiah jong ki khyllung kynthup ia ka jingkoit jingkhiah ha ka met, ka jingroi ha ka jingmut jingpyrkhat, bad kiwei kiwei kumjuh ruh ha kaba iarap ban pynduna ki jingpang bapher bapher.
U Dr. Shylla haba kren halor ka jingdonkam jong ka jingkoit jingkhiah na ka bynta ki khynnah bad ki longkmie u la kyntu ia ki ASHA ban pynshlur ia ki nongshong shnong ban ai dud ia ki khynnah haduh shi snem ka rta.
Kiwei de kiba la ai jingkren ha kane ka sngi ki kynthup ia u Dr. R.M. Lamare uba dei u Medical & Health Officer ka Khliehriat Civil Hospital, ka kong R. Dhar kaba dei ka Community Health Officer (CHO), Dr. N.P. Suchiang, u ma A. Dhar bad kiwei.
Hadien jong kane ka prokram la pynlong pat sa kawei ka prokram halor ka World Hepatitis Day 2025 halor ka phang “Let’s Break it Down” ba la pynlong da ka National Viral Hepatitis Control Programme, National Health Mission (NHM), ha Khliehriat East Community Hall, Khliehriat.
Ha kane ka prokram ruh la iadon lang da u DM&HO ka East Jaintia Hills District u Dr. D. Shylla, ha ka jingdon ryngkat Dr. Dawanroy Nongpluh, Dr. N.P. Suchiang, Dr. J. Nongtdu ka kong D. Passah nalor kiwei de.
