Ka Federation of Khasi Jaintia & Garo People ( FKJGP) South West Khasi Hills District hapoh ka jingïalam u Bah Kenesjune L. Nonglait, President bad u Bah Balse Kharbani Secretary mynta ka sngi ka 4 tarik u Nailar 2025 ka la leit ban khynra Trading Licence ha ka shnong Umsur, Nonghyllam bad Nongjri kiba hap hapoh ka South West Khasi Hills District.
Ka jingleit khynra trading ka seng FKJGP ia ki dukan bar jylla ka dei kum shibynta ban peitngor ia ka jingioh rung kyrthep ki bar jylla hadien ba ka sorkar Assam ka la khynra ia ki briew bym dei trai ri trai muluk.
Ha kane ka jingkhynra ka seng ka la lap ba don katto katne ki dukan bym don trading licence bad don ruh ki dukan ba la khang khyrdep hi hadien ba la iohi ia ka jingkhynra bad don ruh ki dukan kiba ka seng ka la hap ban khang khyrdep hi.
Na ka liang u bah Kenesjune L.Nonglait haba ai jingkren sha ki lad pathai khubor u la kyntu ia ki paitbah ka thaiñ ba kin sangewbha ban peitngor ha kaba iadei bad kane ka jingwan rung kyrthep ki briew ba nabar. U la ong ruh ba ka seng kan sa buh hi ia ki khyrdop ban peitngor ia ki briew kiba nabar.
Katba na ka liang u bah Balse Kharbani u la ïathuh ba ka long kaba phylla ban lap ba ki dukan die dawai (drug store) kim don ia ki trading licence bad ki licence pharmacy ruh kim don, “Ngi kum ka seng ngi kyntu ia ki bor bahalor khamtam eh ia ki bor ba dei peit ia ki drug store ba kin wan check ha kine ki jaka namar ba ki ba bun ki ialeh thurmur bad kim don wat tang ka licence pharmacy”, la pynpaw u bah Kharbani.
