Ka Sorkar jylla mynta ka sngi ka 5 tarik Nailar 2025 ka la sam jingiarap pisa kaba 10,000 hajar tyngka, sha ki nongshongdie madan kiba shong die dukan thymmai ha MUDA.
Ha kane ka sngi ba sam jingiarap pisa la don lang u Symbud Myntri Rangbah ka Jylla uba peit ruh ia ka tnad Urban Affairs ka Jylla u Ma Sniawbhalang Dhar ha ryngkat ka jingiadonlang u Myntri ka tnad Kam jngohkai u Bah Paul Lyngdoh ki ophisar ka tnad Shillong Municipal Board, bad ki ophisar ka tnad Urban Affairs, bad ki nongdie madan.
Ha kane ka sngi la don ruh ka jingjurip ia ki dukan jong ki nongdie madan ha MUDA ban ia kren ha kaba iadei bad ka jingkynduh jingeh jong ki ha kitei ki jaka kiba thymmai kiba ka sorkar ka la pynkynriah na Khyndailad sha MUDA Parking Lot.
Haba ai jingkren ha kane ka sngi na ka liang u Bah Paul Lyngdoh u la ong, ka long ka sngi kaba sah jingkynmaw bad kaba jop ha kaba lah ban pynkylluid ia ki jaka sor bad ha ka juh ka por ngi donkam ban buh jingmut ia kane, ki lynti iaid ki surok baroh ki dei kiba pyndonkam ia ki la ka long ki nongniah kali, ki nongiaid kjat, na ka bynta ki nongdie madan kiba ka sorkar ka la pynbiang ia ki jaka ba thymmai.
Shuh shuh u la ong ka hok jongno jongno kam dei ban khate ia ka hok jong kiwei pat bad u la pynpaw tang kane ka sorkar kaba la shim ia ka sienjam, ym tang ba ka pynshna ia ki dukan bad pynkynriah ia ki hynrei ka ai ruh ka jingiarap pisa sha kine kiba die madan kiba la shah pynkynriah sha ki jaka thymmai ha MUDA Parking Lot.
Shuh shuh u la pyntip ka sorkar ka la sdang ruh ban pyntrei ia ki jaka leit shabar kumta 15 tylli ei ei ia kiba leit ba wan ha kane ka thaiñ.
U la bynrap “Ka sorkar kam shym leh beiñ iano iano bad ngi ngeit ba ngin ia trei lang ryngkat ban kyntiew ia ka nongbah Shillong khnang ba kan long kaba khring ia ki nongleit nongwan, kaba khring ia ki traishnong bad khamtam ia ki paidbah ba kin iaid khlem kano kano ka jingtieng” ong u bah Paul. U la kyntu ruh ia ki paidbah ba kin wan ban sakhi ia kane ka iew kaba thymmai ba kin wan thied na kine kiba shong die madan thymmai ha Parking Lot MUDA.
Na ka liang u Ma Sniawbhalang Dhar haba ai jingkren u la ong, kum u Nongialam u sngewrem ban iohi ba ki nongdie madan ki shong ki die bad ki bam ha ki surok, bad donkam ban leh ei ei, bad u la ong ngim lah ban ai kumba ki kwah hynrei ngi pyrshang ban ai ha ki jaka ki ba biang bad ka lah ban ktah shipor, kumba long u nongpang ha ki por ba leh surgery ka pang, hynrei ioh jingkoit baroh shirta bad ka jingkwah ka sorkar ruh ka dei kumta.
Shuh shuh u la pynpaw ba kine ki jaka kiba shong kiba die madan ka dei ban khuid dei ban don ka light, bad kiwei kiwei ki jingdonkam bad lada don kano ka jingeh pyntip sha ka sorkar ngin pyrshang katba lah na ka liang ka sorkar pyntip u Ma Sniawbhalang Dhar.
U la bynrap haba iadei bad kito ki bym don lang ha ki kynhun jong ki nongdie madan u khot u wer ia baroh ban iatreilang na ka bynta ka jingbha bad u la ong da wan kiba na bar da khuid ka sor shillong mano bym sngew sarong bad u la ong ia ka sor Shillong ngim lah ban pynkylla bad baroh ki lah ban pynkylla bad kane mynta ka dei ka sngi kaba ngi lah bad u aI khublei ia baroh.
Khatduh u la ong kum ka sorkar ka don ka por ba ngi lah ban leh kyrkieh ia kino kino ki mat bad don ki por ba ka shim por khyndiat.
