Ka kynhun jong ki Doctor na ka ophis District Medical & Health Officer, West Jaintia Hills District, Jowai lyngba ka AYURVIDYA hapoh ka prokram ‘Health Lifestyle through AYUSH for School Children’ kaba dei shi bynta na ka ‘AYUSH Public Health Programme’ kaba hap hapoh ka National AYUSH Mission (NAM), kila wan sha ki skul bapher bapher kiba don hapoh West Jaintia Hills District na ka bynta ban ai ka jinghikai ia ki khynnah skul ha ki rukom bapher bapher.
Mynta ka sngi ka Dr. B.T. Hinge ryngkat bad ka kynhun jong ka kila wan sha ka skul Khimusniang Govt. L.P. School, Jowai kaba don ha Khimusniang Pohkseh na ka bynta ban ai ka jingbatai sha kine ki khynnah skul, ha ka jingiadonlang ki nonghikai skul. Ia ka jingbatai la ai da ka Dr. Hinge kaba la pynsngewthuh ia ki khynnah skul shaphang ki jinglong bapher bapher ba ki khynnah khynnah ki shait don. Kine ki jinglong ki kynthup ia ka jingkloi ban bitar, ka jingdom riang, ka jingbymkohnguh bad ruh ka jingeh jong ka jingbym lah ban pynleit jingmut, ki don ruh ki jait jingeh kiba paw shabar bad ki jingeh kiba don shapoh jong ki jingmut jingpyrkhat. La ai ruh ia ki ia ka jingsneng jingkyntu ban long kiba lait na kum kitei ki jinglong, khnang ba kin nang lah ban kiew shaphrang ha ka jingim jong ki.
Nalor kane la pynsngewthuh ruh ia ki khynnah shaphang ka jingkylla ha ka met ka phad la ka dei ia ki shynrang ne kynthei, haba kin iehnoh ia ka rta jinglong khynnah bad kynjoh sha kawei pat ka rta ba kham shalor.
Kaba kham kongsan shuh shuh ka Dr. Hinge kala batai ruh shaphang ka jingdonkam ban tip ban bam ia ki jingbam kiba tei met bad ban kiar na ki jingdih ne jingbam ia ki kynja duma, ka kyiad bad u drok. Ka la pynkynmaw ruh ba kum ki khynnah skul ki dei ban long kiba smat ba sting ban thung jingthung, khamtam ban thung ia ki jingthung kiba long dawai kum u Aloe Vera bad u Neem, namar kine ki jingthung ki long ki dawai kiba bha na ka bynta ka jingkoit jingkhiah jong ki briew.
Hashwa ban pynkut ia ka prokram la sam ia ki khulom, ki note book bad ki kot lyngkdop sha ki khynnah bad ki nonghikai. Hadien kane kala don ka jingiashondur lang ha phyllaw ka ïingskul.
