Mynta ka sngi ka 5 tarik Nailar 2025, u Myntri Rangbah ka Jylla Conrad K. Sangma ryngkat bad ka Myntri ba khmih ia ka kam Rep ha ka Jylla Kong Ampareen Lyngdoh, MLA ka Mylliem Constituency Bah Ronnie Lyngdoh, DC East Khasi Hills Kong Rose Mary Kurbah, IAS, lem bad katto katne ki ophisar ki la leit sha ka Shnong Mawkriah kaba dei kawei na ki jaka rep Syntiew kaba la sdang paw bha ha khapsor.
Ha katei ka jingleit sakhi da lade ia ka kam, u Myntri Rangbah u la pynbna ruh ba la mang 240 klur lyngba ka “Floriculture Mission 1.0” na ka bynta 3 snem, ban pyntikna ba ka kam rep Syntiew kan kiew ha ka jylla.
U Myntri Rangbah u la iathuh ba ia kane ka mishon la sdang naduh u Lber 2024 bad la don kumba 500 ngut kiba la dep ban pyntreikam ia kane.
Haba ai jingkren ha kane ka sngi u Myntri Rangbah u la ong “Lyngba ka Horticulture Mission, mynta ka sngi, ngi Kyrshan ia shibun ki nongrep na ka bynta ban shna ia ki Ïing buh syntiew bad ban pynsan ia ki. Lyngba kane ka jingkyrshan barit na ka Sorkar, kane kan iarap shibun ia ki nongrep ba kin lah ban kamai. Ngin bteng ban Kyrshan ia ki nongrep jong ngi ha kaba ngin iateh ruh bad shibun ki tnad bapher bapher na ka bynta ban pynpoi ia une u jait jingrep sha ki ri Bapher”.
U Sangma u la iathuh ba katkum ka jingioh jingtip na ki stad khmih ia ki syntiew, u ‘Tiew Lili na kane ka Jylla u dei uwei na ki jait syntiew ba paka tam ha ka Ri na ka daw ka jingbha jong ka khyndew bad ka jinglong suiñ bneng.
U Myntri Rangbah u pynshlur ia baroh ki nongrep ban shim ia kane ka kabu namar ka Sorkar ka ai ia ka jingkyrshan ba pura.
