Ka Hynniewtrep National Youth Front (HNYF), Jaintia Hills Zone, ka pynpaw ïa ka jingsngewkhia kaba khraw halor ka jingpynher briew ba la pynlong da ka Sorkar Assam, kaba lah ban wanrah ïa ka jingbym shai la kane kan ktah ne em ïa ka jylla Meghalaya, khamtam eh ïa ki thaiñ khappud jong ka Jaiñtia Hills.
Ki shnong kum ka Khanduli, Saphai bad Ratacherra ki don ha ka jaka ba kham buh ka jingma namar ki dei ki shnong ba don marjan bad ka jylla Assam, ba ki suk ban rung bad ban buhai shnong ha kane jylla Meghalaya. Ka jingbym khmih bniah ne ka jingleh mynthi da ka sorkar Jylla kan sa buh ha ka jingma kaba khraw ïa ka jylla kaba rit, kum ka Meghalaya bad khamtam ïa ki trai shnong kiba don ha pdeng ka jingialeh ban ïada ïa la ka jinglong kyrpang bad ka hok long trai.
Ka HNYF Jaintia Hills ka pynpaw shai ba lada ka sorkar Meghalaya kam shim khia ïa kane ka kam, kam banse ban buh noh da ki (Check Point) la jong ha ki khappud kum ka Khanduli, Saphai, Ratacherra bad ban pynshlur ruh ïa ki Dorbar Shnong bad ki paidbah ba kin ïa trei lang khnang ban khang lad ïa kino kino ki jingwan rung beaiñ.
Ka sorkar ruh ka dei ban pynshai paidbah ïa la ka rai bad sienjam baka la shim bad ki lad jing iada khnang ba kine ki briew kim ioh lad ban wan buhai shnong hapoh ka bri hynñiew trep. Ka HNYF Jaiñtia Hills, ka kyntu jur ïaka sorkar ba kan shim khia bad pynlong ka sien jam kaba tyngeh ban ïada ïa ka jylla na ka jingwan rung kyrthlep jong ki briew ba nabar (influx).
Lada ym lah ban ai jingiada mynta ka lawei ka jaitbynriew jong ngi kan long kumba la jia ha kiwei pat ki jylla kum haka jylla Tripura. “Kane ka dei ka por ba ngi dei ban ïeng, ym ban shu shong kli kti. Ka lawei jong ka jylla bad ka jaitbynriew Hynniewtrep ka don ha ngi ki ba mynta ban iada ia kiba lashai, lada ka Sorkar kam lah ban shim khia, ka (HNYF) Jaintia Hills, ka long kaba kloi ban shim da lade ban ïeng ha ka nongrim jong ka hok bad ka jingim lang jong ka jaitbynriew”.
Khatduh naka liang ka seng lyngba u samla ba peit iaka HNYF Jaiñtia Hills u Pynbiang Rymbai u la kyntu iaki para doh para snam naduh ki nongialam shnong, ki kynhun samla shnong, ki seng long kmie, ki trai ba ai bylla trei, ki trai ïing ba ai wai ban long kiba stad bad phikir bha haba don kino ki bar jylla ba wan shapoh u pud u sam jong ki, khnang ba ngin ioh ki lad jingiada daka ba ia treilang, pynkut ka kyrwoh na u P. Rymbai.
