Ka Department of Political Science jong ka Synod College kaba dei kawei na ki College kaba la paw nam bha ha ka jylla Meghalaya bad ha ka ri hi baroh kawei.
Mynta ka sngi ka 7 tarik u bnai Nailar 2025 ka la pynlong ïa ka jingialang plie ia ka National Seminar kum shi bynta ïa ka jingrakhe jong ka College ïa ka Diamond Jubilee.
Ia kane ka jingïalang la pyniaid da u Dr M. Rani, Vice Principal bad la ioh ruh ia ka jingkren pdiang na i Dr G Lyngdoh, Principal jong ka College.
Ka Phang pdeng jong kane ka jingialang ka long halor ka Media and Democracy, Perspectives and challenges in Northeast India.
La ioh ïa ka jingkren maitphang na u Prof. M.P. Lama na ka School of International Studies jong ka Jawaharlal Nehru University Delhi bad u Bah Shemborlang Rynjah uba long u CEM ka KHADC bad uba la long ruh kum u Kongsan ha kane ka jingialang.
Ha ka jingkren halor ka Phang u Bah Shemborlang u la pynkynmaw ia ki kyntien riewstad kiba ong ba u briew uba synshar ia ki lad pathai khubor u synshar ia ka pyrthei hynrei mynta i kumba ngi im ha ka por ba ki briew kiba synshar ia ka pyrthei ki synshar ia ki lad pathai khubor, u la ong ba ki lad pathai khubor ki pynwandur ia ki jingjied bad ia ki jinglong jong u briew ha ka ri synshar paidbah.
Ha kane ka juk jong ki Podcast, Ki Youtube channel kaei kaba sah khlem kylla ka dei ka bor jong ki kyntien namar kata ngi dei ban long kiba don ki jingshisha bad kiba kitkhlieh kumno ngi pyndonkam ia kine rynsan, ki lad pathai khubor ki la dei lypa kiba trei na ka bynta ka jingshisha hynrei ka jingialeh ka long ban pyntikna ba ki lad pathai khubor ki dei ban pynkhlaiñ ia ka jingsynshar paidbah da kaba pynneh ïa ka jingshisha bad ban pyndonkam hok ia ka bor, u la ong.
