Ka seng Pnar Student Movement (PSM), hynne ka sngi Thohdieng 8.08.2025, ka la leit ban khang khyrdep syndon ia ka ophi treikam jong ka company Jio kaba don ha nongbah Jowai, kane ka jingleit khang jong ka seng ia katei ka ophis, ka long ba hadien ba ka seng ka la ioh ia ki jingujor na ki paidbah babun balang kiba dei ki nongshong shnong jong ka Ri Lum Jaiñtia, ha ka jingiadei bad ka jingbyntrei kam bha ka Network Jio ha kiba bun ki jaka jong ka Ri Lum Jaiñtia.
Kumta na ka liang ka seng mynta ka sngi ka la leit mih sha kane ka ophis bad ka la shim ia ka rai ban khang tala syndon ia kane ka ophis, hadien ka jingleit jurip ia kane ka ophis treikam la lap ruh ba don tang ar ngut ki nongtrei ne ki staff ha kaba bun tang ki shuki, kat katei ka ophis ba heh ka ban ai ka jingshakri ia ki paidbah ha nongbah Jowai bad sha kiwei de ki bynta jong ka Ri Lum Jaiñtia.
Ka seng ka la ong ruh haba ki paidbah kiba pyndonkam da ka Jio Number sha ki Bank Account jong ki, kumjuh ruh sha ki ophis sorkar bapher bapher ki hap ban bteng ban recharge ia ka Jio number jong ki, namar ki la pyndonkam naduh ba sdang, kumjuh ruh la ong ba ha ki por ba la leit ne mynshwa ka network Jio ka long kaba iaid beit iaid ryntih hynrei mynta pat ka la pynthut shi katdei eh ia ki paidbah.
Kumta na ka liang ka PSM ka la bthah ia kane ka Company ba kam pat dei ban plie ia kane ka ophis jong ka, kat ba kam pat lah ban pynbiang ia ka Network jong ka kat kum ka jingdonkam jong ki paidbah. Ong u Vice President PSM u samla Owan S Paswet.
