Ka tnad AYUSH jong ka ophis District Medical & Health Officer, West Jaintia Hills District hapoh ka National AYUSH Mission (NAM) kala ioh ban pynlong ia ka prokram thung dieng ba kyrpang kaba la tip kum ka AYUSH Gram Medicinal Plants Plantation Cum Awareness Programme ha Nangbah PHC.
Ia kane ka prokram la pynlong ha ka 7 tarik mynta u bnai ha Nangbah PHC, West Jaintia Hills District kaba la sdang naduh ka por 11 baje mynstep. La wan ban iashim bynta ha kane ka sngi da ka Kong B. Blah, Addl. Deputy Commissioner, West Jaintia Hills District. Ha kane ka jingthung ia ki dieng ka tnad AYUSH ka la ioh ban thung haduh 14 jait ki dieng ba long dawai ha phyllaw jong katei ka PHC, ha kaba la iashim bynta naduh ka kong Blah, ki Doctor bad kiwei de ki nongtrei ka tnad.
Ka jingthmu jong ka tnad AYUSH ban thung ia kine ki jait dieng ba long dawai ka long ban pynjan ia ka jingiarap sha ki nongpang. Ka jingdon jong kine ki dieng ba long dawai ka pynsuk ban ioh ia ki jingiarap kiba kloi ha kano kano ka por ba kyrkieh.
Kham ha shwa jong ka prokram la don ka jingialang kaba lyngkot, ia kaba la pyniaid da ka Dr. Damika Rymbai, AYUSH, M.O Nangbah PHC, ka jingkren pdiang da ka kong B. Lytan CHO Nangbah PHC. Ka jingkren lamphang da ka Dr. Bonnie T Hinge kaba dei ka District Nodal Officer, AYUSH, West Jaintia Hills District.
La ioh ia ka jingkren ba kyrpang halor kane ka phang da ka kong B. Blah, MCS, Addl. DC.
Ia ki kyntien ai khublei la ai da u ma Pynkhreh Susngi, DPM, National AYUSH Mission WJ Hills District.
