“Duh COV ki Khasi kiba la shong die jingdie da ki phew snem, ïoh ei ki bar jylla”
Ki nongdie madan ha 9-Lad kiba khlem pat ïoh ïa ka Certificate of Vendor (COV) haduh mynta ka sngi ki la bteng ban iakhih da kaba shong ha 9-Lad bad rah ruh ia ki plakad jong ki ban pynpaw halor ka jingleh shiliang jong ka Shillong Municipal Board (SMB) ban ai syrnod.
Katei ka jingiakhih jong ki nongdie madan ka la sdang hynnin ka sngi ka 8 Nailar 2025 bad namar ba leh kyllut ka Sorkar bad SMB, kitei ki nongiakhih ki la rai ba naduh ka 11 Nailar 2025, kin sdang noh ia ka jingiakhih kaba kham khia, kata da ka jingshong shahthngan kaba khlem buh pud (24 kynta) haduh ba kin ioh ia ka jingangnud jong ki.
Katkum ka jingiathuh jong kitei ki nongdie madan, hapoh 100 ngut kiba la shah kyntaid bad khlem pat ai ia ka COV watla ki la dep ban leit pynrung kyrteng (register) naduh ba ka SMB ka la bthah ia ki ban leh kumta. Ki la iathuh ba na ka por sha ka por ki la leit ban mih sha ophis SMB bad ki la shuh ong ia ki ban iai ap.
Haba sngap ia ka sur jong ki nongdie madan kiba la shah kyntaid, ki la iathuh ba bun kiba la mih madan naduh mynnin ka sngi ki dei ki Khasi bad ki la pynpaw ruh ia ka jinglyngngoh ba kumno ki bar jylla ki ioh COV katba ki trai shnong kim ioh. Nalor kata, ki la iathuh ba bun kiba la duh syrnod ki dei kiba la shong die jingdie da ki phew snem ha 9-Lad.
Ryngkat ka jingdiaw, ki nongdie madan ki la rah ia ki plalak kiba thoh “Ka hok ban kamai ka dei ka Hok ban im” – “Ngi la pyndep ïa ka Survey, shaei ka COV?”, – Balei slem ban ai COV, mano ban bah khlieh?? – Bah P.K Boro ai noh ka COV jong ngi.
