-Lada ym lah ban pynbiang ha ka por yn khang tala shi syndon ia ka ophis Jio-
Ka Pnar Student Movement (PSM), Central Body, ha ka jinglamkhmat u President ka seng u samla Embhah Passah, ha ryngkat u General Secretary samla Leo F Suiam bad ki dkhot ka seng, hynne ka sngi 09.08.2025, ki la iakynduh ia ki heh ka Jio company kiba la wan na Guwahati, Shillong bad ki Incharge ka Jio kiba don hapoh ka Jaiñtia Hills baroh kawei.
Ha kane ka jingiakynduh (meeting) na ka liang ki heh jong ka office Jio, ki la kabur, ba don ka jingbakla ka jong ki ha ka jingiadei bad ka jingbym shim khia ka jong ki halor ka jingujor ka seng ha kine ki sngi kiba la dep.
Kumta ha kane ka jingiakren ka seng ka la buh por ia ka Jio ban pynbiang ia ka Network hapoh shi taiew, ha kaba na ka liang ki nongtrei ka Jio ruh ki la kular ban don da ka Joint Inspection ryngkat bad ki dkhot ka seng na ka bynta ban pynbiang ia ka Network Jio kat kum ka jingdonkam jong ki paidbah, katba na ka liang ki nongialam jong ka PSM ki la maham ban khang tala shi syndon ia kane ka office Jio ha Jowai, lada kam shim khia hapoh katei ka por ba la buh da ka seng.
