Hadien ba ka seng KSU SWKHD bad ka KSU Ranikor Circle ki la pynpaw ïa ka jingpyrshah kaba jur halor ka jingrai jong u Syiem ka Hima Maharam bad ka Executive Dorbar naduh u bnai Jylliew 2025 ban ai jaka ïa ki shipai ha Photmula kaba hap hapoh ka Ranikor Civil Sub Division.
Mynta ka sngi sa ka seng Hynniewtrep Achik National Movement (HANM), South West Khasi Hills District hapoh ka jingialam u samla Lambokstar Marwein ka la ai ïa ka jingkyrshan ba pura ïa ka KSU SWKHD bad pyrshah ïa kane ka rai jong u syiem bad ka Executive Dorbar ban ai jaka ïa ki shipai.
Ka seng ka dap ruh da ka jingsngewkhia kaba khraw namar kine ki dei ki jaka rep jong ki khun ki hajar ka Hima Maharam bad u samla Lambokstar Marweiñ u la pynpaw ruh ba ka jingai noh ïa kane ka jaka sha ki shipai kan sa wanrah ïa ka jingduhnong kaba khraw ïa ki khun ki hajar ka Hima bad ka pateng ka ban sa wan.
Kumta na ka liang ka seng ka kyntu ïa u Syiem bad ka Executive Dorbar ba ka dei ban pynsnageh noh ïa ka jingai jaka ïa ki shipai bad lada kim sngap ka seng kam banse ban shim da kiwei pat ki lad ki lynti.
