Ka Dorbar Shnong Tympang Ïawmusiang, Jowai, kum shi bynta ka jingkyrshan ia ka Khooid Ya Ka Wah Myntdu, ha ka jinglamkhmat u ma Khroo L Pariat President KYM, ban iakhun ha NGT Principal Bench New Delhi, na ka bynta ban ioh ia ka hok jong ka wah Myntdu kaba pynbiang ia ka um bam um dih, ka bording, kaba iarap ia ka khyndew ka lyer, ia ki paidbah nongshong shnong ka nongbah Jowai bad kiwei kiwei de ki shnong kiba shong ba sah sawdong jong ka wah Myntdu.
Mynta ka sngi ha ka jingialam u ma A. Lywait Waheh Shnong ka Tympang Iawmusiang ryngkat u ma H. Laloo General secretary bad kiwei kiwei de ki rangbah ka shnong Iawmusiang ki la leit ban ai ka jingiarap da ka pisa kaba T.20,000/- (Ar phew hajar) tyngka, ia kaba la aiti ha u ma Khroo L Pariat u President Khooid Ya Ka Wah Myntdu, kaba long kum ka dak ka jingkyrshan bad jingiadon bynta lang jong ka shnong.
Ka shnong Iawmusiang ka khmih lynti ruh ba ka NGT Principal Bench New Delhi, kan pynioh ne ai ia ka hok ka wah Myntdu na ka bynta ka jingshngaiñ ka imlang sahlang bad ka longbriew man briew. Ha kane ka sngi la don lang ruh u ma R. Lamar, ma GH Bareh, ma E. Niangti, ma E. Dkhar bad kiwei de ki rangbah ka Iawmusiang bad ki dkhot ka KYM.
