Ban pynsngewthuh paidbah shaphang ka jinghikai ha ki rukom treikam bapher (vocational training) bad ki lad kamai kajih, ka Industrial Training Institute (ITI), Khliehriat ha ryngkat ka jingïatrei lang bad ka District Employment Exchange, ka la pynlong ïa ka Programme ai jingtip bad jinghikai (Awareness-cum-Exhibition Programme), kaba la pynlong ha phyllaw ka ITI, Khliehriat mynta ka sngi ka 14.08.2025.
La sakhi ïa kane ka prokram da ka Additional Deputy Commissioner, kong J.U Kharpuri, MCS, Vice-Principal ka ITI, G. Sohshang, u Assistant Employment Officer, Donkupar Mairom, ki nongïalam shnong, ki nonghikai bad ki samla pule.
Ha ka jingkren jong ka kong Kharpuri, ka la kdew ïa ka jingdonkam jong ka vocational training ban kyntiew ïa ka jingiohkam iohjam ha ka imlang sahlang bad ka la kyntu ïa ki samla, khamtam kito kiba la ieh skul shiteng por, ba kin pynrung kyrteng sha ka ITI ban pynbha ïa ka lad kamai kajih jong ki.
U Vice-Principal Sohshang u la kdew ruh ba ka jinghikai ba la pynshong nongrim ha ki sap treikam (skill-based training) ka ïarap ban pyniasoh ïa ki jingangnud jong ki samla bad ki lad kaba ki don. U la pyntip ba ki samla ba ïashim bynta ha kine ki course kin ioh jingïarap pisa (stipend) kumba T.600 tyngka shi bnai na ka bynta kito kiba la pyndep Class VIII bad T.800 tyngka na ka bynta kiba la pyndep Class X shaneng.
U Mairom u la kyntu ïa ki samla ba kin rejistar bad ka District Employment Exchange ban ioh jingtip bad ki lad ioh kam hapoh ka District.
Hadien ka jingplie ïa kane ka prokram, ki samla kiba ïashim bynta ki la leit jngoh ïa ki klas ai jinghikai kiba kynthup ïa ki kamra jong ka Computer Operator Programming Assistant (COPA), Wireman, Driver-Cum-Mechanic (LMV), Embroidery bad Cosmetology. Ki nonghikai ki la ai jingpynshai bniah halor ki course, bad la plie ruh jingpynrung kyrteng ha kane hi ka sngi.
