Ka Khasi Student Union (KSU), Upper Shillong bad ka Mawprem Circle mynta ka sngi ka 14 tarik Nailar 2025 ka la leit ban khynra kot khynra sla ia ki bar jylla kiba ieng ban die jingdie ha ki thaiñ Umshyrpi.
Ha kane ka jingleit khynra kot khynra sla ki dkhot ka KSU la lap ba kine ki bar jylla kim don ia ki kot ki sla ki ba biang kiba wan ban die jingdie ha kine ki jaka, wat tang ka Police Verification ruh kim don, hynrei ki wan ban bylla beaiñ shane da ka jingdon ki nongialam kiba iarap ban ai kam ia ki.
Shuh shuh na ka liang ka KSU katba ki dang talasi ia ki kot ki sla, ki la iathuh ba kine ki bar jylla ki iathuh ba ki wan na ka jylla Bihar bad ki dang wan bylla kumba 2 taiew tam ei ei sha nongbah Shillong.
Na ka liang ki dkhot ka KSU ki la phah wan ia ki trai ba ai kam ia kine ki bar jylla, hynrei kim shim la treh ban wan iakynduh, bad ka Seng ka maham tyngeh ia ki bad beh krad shisyndon ia kine ki bar jylla.
Hadien jingtalasi ki dkhot KSU ia kitei ki bar jylla, ki Pulit ka Jhalupara Outpost ki la wan poi ha katei ka jaka bad pan ia ki kot ki sla jong kitei ki bar jylla bad na ka liang ki Pulit ki la rah noh ia kitei ki bar jylla sha thanad ban leh ia kaba donkam katkum ki kyndon aiñ.
