Ka Meghalaya Bharat Scouts & Guides West Jaintia Hills District ka la pynlong ia ka Carrom Board Competition ia ki khynnah Scouts bad Guides ban rakhe ia ka sngi jingioh laitluid ka Ri; ia kaba la wan plie da u ma Ohiwot Laloo, Jt. State Secretary, MBS&G bad u ma J. Pala, District Training Counsellor, MBS&G ha ka 9 tarik bad kaba la pynkut haka 14 tarik mynta u bnai da u kongsan ma A.Andrew Shullai, MDC-JHADC.
Ha kane ka sngi pynkut ka la don ka jingialang ba lyngkot ba la pyniaid da ka Grecorisa Sana, District Organiser (Guides), WJH. La ioh ruh ia ka jingkren pdiang burom na u Carefully Gassah, District Organiser (Scouts), WJH; ka jingsneng jingkraw na ka C.D. Laloo, District Commissioner (G) MBS&G-WJH bad na u Adiam U Bthuh, District Secretary, MBS&G.
U ma Andrew Shullai ha ba ai jingkren u la ong ba ka jingiadonbynta jong ki khynnah ha ka Scouts-Guides Movement ka long ka jingkyrkhu kaba khraw, ha kaba ki khynnah ki ioh shibun ki jingtip bad jingshemphang ha ki rukom bapher bapher, kumta u la ong ba ka jingpynlong ia kane ka jingiakop ka pynlong ban don ia ka mynsiem jingialeh bad jingiaishah.
Ia ka nam lahduh la ioh rah da u Wansalan Dhar katba ki Runners-up ki long ka Deimaya Shylla bad u Jiedkyrpang Dkhar.
