Ha ka 14/08/2025, ka Seng Hynniewtrep Youths’ Council – EJHD ka la sdang ban pynlong ia ka jingtalasi bad ap ia ki bar jylla kiba wan rung shapoh ka jylla lyngba ka Ratacherra Infiltration Check Gate. Ha kane ka jingtalasi, la ioh ban pynphai katto katne ngut kiba thmu ban rung shapoh ka jylla khlem da don ki kot ki sla kiba biang ban pynshisha ba ki dei ki nong India.
Na ka bynta ka jingeh bad ka jingshngaiñ jong ka jaidbynriew bad ka jylla, ka seng ka la pynbna ba kan shong bad ap 24/7 bad kane ka jingtalasi bad jingap ia kiba wan rung sha ka jylla kan iai bteng haduh shi taiew lynter.
U President ka seng, u Bah Preios Pale, u la ong ba kane ka jingpyrkhing kadei na ka bynta ban pynneh pynsah ia ka jinglong trai ri trai muluk bad ban iada na ka jingwan rung kyrthlep ki nongwei ba nabar.
Ha kane ka sngi la ia donlang ki nongialam jong ka seng kiba kynthup ia u Bah Preios Pale – President EJHD, Bah Arky Lamare – General Secretary EJHD, Bah Pass Khaii – Vice President EJHD, Bah Aite Sana – Joint Secretary EJHD, Ki Nongialam ka Narpuh Circle, Ki Nongialam Khynde Shnong Unit bad ki dkhot ka seng.
