Ka jingaitika iada Covid-19 sha ki khynnah kiba don ha ka rta 15-18 snem kala iaid shait shait mynta hapoh West Jaintia Hills ha kaba ki briew jong ka tnad ka koit ka khiah kila leit sha ki skul bapher bapher na ka bynta ban ai tika ia ki khynnah skul kiba la biang rta.
Na ka liang ka District Health Society, West Jaintia Hills kala buh ia ka prokram ban ai tika ia ki khynnah skul naduh ka 18 tarik haduh ka 21 tarik mynta u bnai. Ia ki prokram la phah sha ki skul bapher bapher kat kum ki tarik bala ai ia ki khnang ba kin bthah ia ki khynnah skul ban poi sha ki skul na ka bynta kane ka injekshon.
La sakhi ruh ba na ka liang jong ki kmie ki kpa jong ki khynnah skul ruh ki la iasynran lang ia la ki khun sha ki skul na ka bynta ban pyndep ia kane ka jingai tika.