Ka Jaiñtia Joint Alliance (JJA) kaba kynthup ïa ka WjSU bad ka JYF mynta ka sngi kala shim ïa ka rai ban ujor syndon da ka Public Interest Litigation (PIL) halor rukom pynshna ïa ka madan ïalehkai Synthetic Football Turf jong ka Amlarem Sub-Division Sports Association (ASSA) kaba dang ïaid shakhmat mynta ha Ladjaplem, Amlarem West Jaintia Hills.
Naka liang ka seng lyngba u Alban K Gashnga uba dei u nongai jingmut ka seng ula pyntip shen kin File noh da ka Public Interest Litigation (PIL) namar ka rukom shna ïa katei ka madan kala long kum ka jaka pynïalehkai ïa ki mrad bad kaba ym ïahap dor bad kiwei pat ki madan ïalehkai phutbol ha kylleng ki jaka katkum ka dor bala mang ia ka.
Ula ong ka rukom shna ïa kane ka madan ka lah ban neh tang lai bnai hadien jingleit jurip jong ka seng WJSU bad kiba shna ïa kane ka madan ki plan tang ban pyndep ïa ka skim ban ïoh jingmyntoi ïalade na kane ka project.
Shuh shuh ula ong ka jingpyntrei kala ïaid mynta sha ka 50 present na ka pisa kaba la mang ka long 7 klur 92 lak tam, ha ka jingwad bniah ka seng ka lap ban shna ïa kum kine ki madan Artificial ka lah ban poi sha ka 1 klur 89 lak, hynrei katkum ka RTI la ïoh jingtip ba tang ka Synthetic Turf jong katei ka madan ha Ladjaplem ka poi sha ka 4 klur tam.
“Kane ka dei ka kam paidbah bad ngi kmen haba wan ki kam pynroi (development) kum kane ka madan bol, hynrei kaei kaba ngi pyrshah ka long ba ka Estimate ka long da kumwei bad ka rukom shna pat ka long da kumwei bad haba ngi wad ïa ka jingshisha ngi khlem ïoh satia” ong u ma Alban K Gashnga.
U Everest Langstang (WjSU) Secretary ka JJA ula pynpaw ka jingkmen haba wan kum kine ki kam pynroi hynrei lada ka long ka jingmyntoi kaba biang ïa ki paidbah kim pyrshah satia, hynrei lada phai pat sha ka rukom pyntrei ïa u Artificial Turf ha katei ka madan kam long kaba biang, kumta ka seng kam banse ban shim ïa kane ka sien jam na ka bynta ka jingbha jingmiat jong ki khun samla kiba don ka sap ïalehkai.
Katba u Ombormi Tariang, Chairman JYF ula ong halor kane ka madan ngi la don ka jingïalang ban ïaid shakhmat da kaba iasnohkti lang khnang ba kane ka jingthmu jong ka JJA ban ïakhun da ka PIL kan long kaba jop na ka bynta ka lawei jong ka thaiñ War Jaiñtia hi baroh kawei.
