Ka Seiñ Raij Jowai mynta ka sngi 16 taik u Nailar kala synñiang da ka song pisa kaba Rs. 50,000/- tyngka ha u ma Khroo L Pariat uba dei u President ka ‘Khooid Ya Ka Wah Myntdu’ (KYM) ban ïakhun mukotduma ha NGT Principal Bench New Delhi na ka bynta ka Wah Myntu.
La ïathuh ba kane ka jingïakhun ka long na ka bynta ka hok jong ka Syiem Myntdu kaba kiar talawiar ïa ka sor Jowai, namar kumba long mynta ka jingshah pynjot jong ka Wah Myntdu kala jur bha naduh ka jingbret pathar ïa ki ñiut ki nier bad ka jingtheh khyndew sha ki bynta ka wah na ka jingpyntrei surok bad kumjuh ka jingshah ktah jong ki pynthor kba ha shi lynter ka Wah Myntdu.
Hashwa ban aiti ïa kane ka song pisa la don ka jingïalang ba la pynïaid da u ma EMH Passah, Vice President Seiñ Raij Jowai. La ïoh ruh ka jingkren na u ma R. Lamarr, ma J. M Pohsngap bad u ma A. Sumer General Secretary, SRJ.
La ïadonlang kumjuh u ma W. Kharbuki Asst General Secretary ka Seiñ raij Jowai, u ma J. Sumer Treasurer ka SRJ bad kiwei de ki dkhot ka Seiñ Raij Jowai.
