Ka KSU East Jaiñtia Hill District lyngba u Vice-President u Phanuel Tongper, KSU Narpuh Circle bad ruh ha ka juh ka por kum u Environment Secretary ka KSU EJHDU District Unit, ha ka 16 tarik u Nailar 2025 ka la pynlong ïa ka Checking Drive ne khynra bar jylla ia kiba wan rung sha ka Jylla Meghalaya lyngba u surok NH6 kaba pynïasoh ïa ka jylla Assam bad ka thaiñ Barak Valley.
Ha kane ka jingkhynra ka seng la ïoh ban bat ïa shibun ki bar jylla ki bym biang ïa ki kot ki sla kum ka Labour Licence, Work Permit bad kiwei kiwei.
Hadien kane ka seng ka la ïoh ban pynphai biang ia ki lait noh tang ia kito kiba ïaid na Silchar lyngba ka jylla ban leit sha Guwahati.
Ka seng ka la leh ïa kane khnang ban teh lakam ïa ki phetwir kiba suba ba ki lah ban dei ki nong Bangladesh kiba shah kyndang ha ka sorkar Assam ha ka Eviction Drive kaba dang ïai bteng haduh mynta.
Ha ka jingïoh jingtip jong ka seng ba ki phetwir ba shah kyndang ha ka sorkar Assam mynta bun na ki kiba phai khmat sha ka jylla Meghalaya namar ki tip ba ka jylla Meghalaya haduh mynta kam pat don ia ki aiñ kiba lah ban teh lakam ïa ki, ym kum sha kiwei kiwei ki jylla jong ka North East India kiba la don ïa ka Inner Line Permit.
Ka seng ka phah ïa ka kyrwoh sha ka sorkar jylla, ban pyntreikam mardor ïa ka ILP, bad nang pyntreikam ruh ïa ka MRSSA da kaba don bniat hapoh ka jylla khnang ban lah ban teh lakam ïa ki barjylla kiba wan rung sha ka jylla.
Ka seng ka la rai ba nangne shakhmat kan nang pynkhlaiñ shuh shuh ïa ka jingkhynra bar jylla khnang ban lah ban teh lakam ïa kano kano ka jingma ia ka Ri bad ka Jaidbynriew.
