Ka Hynñiewtrep Youths’ Council (HYC) EJHD mynta ka Step jong ka 17 tarik ha ka por kumba 3 baje shiteng mynstep kala ïoh ban pynphai shi bus ïaki briew kiba mut ban wan rung shapoh ka Jylla khlem ki kot ki sla ki ba biang.
Ka seng kala sdang ïa kane ka jingkhynra naduh ka 14 tarik bad kan neh shi taïew lynter lyngba ka Ratacherra Infiltration Check Gate, ha ka sngi sdang ka seng kala ïoh ban talasi bad ap ïa ki nongnabar kiba wan rung beaiñ shapoh ka jylla.
Ha kine ki sngi ba pynlong jingtalasi, la ïoh ban pynphai katto katne ngut kiba thmu ban rung shapoh ka jylla khlem da don ki kot ki sla kiba biang ban pynshisha ba ki dei ki nong India.
Na ka bynta ka jingeh bad ka jingshngaiñ jong ka jaidbynriew bad ka jylla, ka seng ka la pynbna ba kan shong bad ap 24/7 bad kane ka jingtalasi bad jingap ïa kiba wan rung sha ka jylla kan ïai bteng haduh shi taïew.
U President ka seng, u Bah Preios Pale, ula ong ba kane ka jingpyrkhing kadei na ka bynta ban pynneh pynsah ïa ka jinglong trai ri trai muluk bad ban ïada na ka jingwan rung kyrthlep ki nabar.
Kiba nongïalam ka seng kiba ïadonlang ki kynthup naduh u Bah Preios Pale – President EJHD, Bah Arky Lamare – General Secretary EJHD, Bah Pass Khaii – Vice President EJHD, Bah Aite Sana – Joint Secretary EJHD, kumjuh ki Nongïalam ka Narpuh Circle, ki Nongïalam Khynde Shnong Unit bad ki bad ki dkhot ka seng.
