Ka kynhun jong ka Estimates Committee jong ka Meghalaya Legislative Assembly, ka la leit jurip (spot inspection) ia ka Ri-Bhoi District ha ka 18 tarik Nailur 2025, ia kane ka kynhun la lamkhmat da u Mayralborn Syiem, MLA Nongpoh, uba long ruh u Chairman ka Committee on Estimates, ha ka jingsynran lang ruh ki dkhot jong ka Committee, kiba kynthup ia u Wailadmiki Shylla MLA Jowai, u Remington Gabil Momin MLA Rambrai Jyrngam, u Charles Marngar MLA Mawhati bad u Adelbert Nongrum MLA North Shillong kumjuh ruh u Dr. Celestine Lyngdoh, MLA Umsning, u la synran lang iaka kynhun ha ka jingleit jurip ha Umsning, ryngkat ka jingdonlang ki heh sorkar na ka PWD, PHE, ka Meghalaya Legislative Assembly bad kiwei ki tnat sorkar ki la donlang ha kane ka jingleit jurip.
Ki jaka ba la leit jurip ki kynthup ia ka Industrial Training Institute (ITI) ha Nongkhrah, ka Nongpoh Polytechnic bad ka ophis jong u Block Development Officer (BDO) ha Umsning C&RD Block kaba dang shna haduh mynta.
Hadien ka jingleit jurip, u Chairman jong ka Committee, u Mayralborn Syiem u la ong, “Ka dei ka jingkmen jong ngi ban lah ban pynlong ia kane ka jingjurip lyngba ka Estimates Committee jong ka Meghalaya Legislative Assembly. Ka thong jong ngi ka long ban peit bniah ia ki jingtei kiba dang sahteng kaba dei kum ka ophis BDO ha Umsning C&RD Block. Kane ka projek ka la sah teng bad ka Committee ka la lap ba bun ki daw bad jingeh kiba pynslem ia ka jingtei.
Ngi la leh ia ka jingjurip kaba bniah bad la ioh ruh ia ka jingpynshai kaba kham shai na ki heh jong ka Community and Rural Development Department. Ka Committee ka la bthah ia u contractor ba dei peit ban pyndep ia kane ka kam ha ka por ba la buh, kata ha u Naiwieng 2025, kumba la kular da u contractor bad ki bor sorkar.
Ngi kyrmen ba lyngba ka jingpeitngor man ka por bad ka jingangnud jong ka sorkar ban pyndep lut ia ki ophis C&RD Block ha kylleng ka jylla, ki ophis ka ba la dep tei ne ki ban dangwan kin ai ka jingshakri kaba kham bha sha u paidbah, ki rangbah shnong, ki Village Organisation (VO) ki NGO bad ki Self Help Group.”
U la bynrap ruh, “Mynta ngi la leit jurip ruh ia ka projek shna ITI ha Nongkhrah bad ka Nongpoh Polytechnic. Ka projek jong ka Polytechnic ka iaid shait shait bad lah ban pyndep ha ki bnai ban wan, kaba long ka jingmyntoi na ka bynta ki samla pule ba kwah pule ha ki lain technical course bapher bapher.
Hynrei, ka projek jong ka ITI ka la sah teng namar ki jingeh kum ka jingtei ia ka surok ban rung sha ka jaka, ka bording elektrik kumjuh ruh ka um. Ka Committee ka la shim khia ia kine ki jingeh bad kan buddien ia kine ki mat bad ki tnat sorkar kiba dei peit ban pynthikna ba ka projek kan treikam noh mardor.”
Ki mat ba kongsan, ka long ka Umsning C&RD Block Office, ban pyndep hapoh u Naiwieng 2025. Ka ITI bad Polytechnic, kiba dei ban weng mardor ia ki jingeh ha ka jingtei bad kiwei ki jingdonkam.
