U MLA ka Mawsynram, u Bah Olansing Suin bad u MLA ka Ranikor, u Bah Pius Marweiñ hynnin ka sngi ka 18 tarik u bnai Nailar 2025, ki la lum lang ïa ki heh shipai jong ki 16 tylli ki Border Outpost jong ki Border Security Force (BSF) naduh Mawsynram haduh Ranikor bad kumjuh ki heh pulit ha katei ka thaiñ ban twad jingmut ïa ka daw jong ka jingïoh rung laitlan ki khar Bangla hapoh u pud u sam jong ka India ha kitie ki thaiñ, kaba la buh jingma haduh katta katta ïa ki paidbah nongshong shnong ka thaiñ.
Haba kren sha ki lad pathai khubor hadien ba la kut ka jingïalang, u bah Pius Marwein u la ong ba ka daw ba kongsan ba kum ki MLA ki la hap ban lum ïa ka jingialang ka long ban sngap na ka sur jong ki BSF bad pulit kaei ka daw jong ka jingïoh rung laitlan jong ki khar Bangla hapoh India ban tuh ban thiem bad leh ïa ki kam pyntriem, da kaba lute bad rahbor ia ki nong India.
U la ong ruh ba ki BSF ki la pyni ïa la ki jingeh na ka daw jong ka jingpra ki jingker sainar shiah, ka jingdon ki wah bah, bad don ki bynta ba eh ban pahara khamtam ha ka por ba slap ba lyer, hynrei la katta ruh ki BSF ki la kular ba kin ym shong kli kti, hynrei kin trei shitom 24 kynta ban ym ailad ïa ki khar Bangla.
U MLA ka Mawsynram, u Olansing Suin u la ong ba kum ki MLA ki sngewkhia bha ïa ka jingwan rung kyrthep ki khar Bangladesh sha ki jaka jong ka ri India namar ba ka jinglong jingman ha Bangladesh kumba long mynta ka long kaba sniew bha bad don napdeng ki khar Bangla kiba la wan rung tuh sha India tang ban shngain la ka jong ka jingim, bad ïa kata la lah ban sakhi da ka jingïoh kem ïa ki katto katne ki khar Bangla.
U Bah Suin u la ïathuh ruh ba ki la ïakren ruh ha kawei pat ka phang bad kata ka long ba ka kamram jong ki BSF ka long ban talasi ïa ki briew kiba wan rung tuh, ka jingkhaïi drok, ki tiar siat bad ki tiar ïaleh.
Kumta, na ka liang jong ki kum ki MLA ki la bthah ïa ki BSF ba haba ki talasi, kim dei ban pynwit ne pynthut ïa ka ïaid ka ieng jong u paitbah, hynrei kidei ban treikam ha kata ka rukom ba kin ïoh ïa ka jingshaniah na u paitbah, namar ba lada don kino kino ki jingjia, lada ki paitbah kim kyrshan, kan long kaba eh na ka bynta ki BSF bad ki pulit ban treikam.
