Hadien ka jingioh jingtip kaba thikna ka tnat Anti-Narcotics Task Force (ANTF), jong ka East Jaiñtia Hills District Police, ba don ki briew ba suba wanrah ia ki kynja dawai dih pynbuaid, kumta la pynlong ka jingkhynra ha ki thaiñ Lumshnong ryngkat ka jingiatreilang bad ki pulit ka Lumshnong Police Station ha ka step jong ka 19 tarik u Nailur.
Ha kane ka jingkhynra, ka kynhun pulit ka la ioh ban kem ar ngut ki briew kiba la suba ruh ba ki donkti ha ki kam be-aiñ kylleng ki jaka jong ki jylla, ha kaba ha kane ka jingkhynra ki pulit kila ioh kurup ruh 10.35 Kg u Marijuana, 2,736 tylli ki Tramadol Hydrochloride Capsules, 6,000 tylli ki Nitrazepam tablets bad 2 tylli ki mobile phone na ki kti jong ki.
Shuh shuh katkum ka khubor pulit la ong ba ha ka miet jong ka 18 tarik u Nailur, ka East Jaintia Hills District Police ka la ioh jingtip kaba thikna ba ki briew kiba suba jur ba ki donkti ban rah lang ia ki dawai pynbuaid ki la mih na Silchar, Assam sha Shillong da ka bus jong ka MTC.
Haba ioh kane ka jingtip, ka kynhun kaba la lamkhmat da ka Lumshnong Police ha ka por kumba 4 baje mynstep jong ka 19 tarik Nailur ka la pynap shrip bad ioh bat ïa katei ka Bus ba ki don, kaba don ia u number ML 03 0222 bad la ioh kem ïa ki ar ngut ki briew kiba kyrteng u Amol Nath (42 snem) uba na ka shnong Sundari Part – III, Silchar, Kachar, Assam bad u Radika Ranjan Das uba shong ha Bamonchora, PS-Komalpur, District-Dholai, Tripura.
Ki pulit ki la register case pyrshah ïa ki ha Lumshnong Police Station hapoh ka kyndon NDPS Act bad ka jingtohkit ia ki, ka dang iaid shakhmat ban tip kham bniah shuh shuh ia ki kam beaiñ jong ki kumjuh ban lap ksai shuh shuh ia kiwei pat kiba donkti ha kum kane ka jait kam.
