Ki MDC ka liang pyrshah ka Khasi Hills Autonomous District Council (KHADC) hynne ka sngi ka 19 tarik Nailar 2025 ki la leit ban ia kynduh ia u CEM ka KHADC u Bah Shemborlang Rynjah ban iakren halor ki mat kiba ia dei bad ka jingbym pat pyllait pisa na ka bynta ki skhim bapher bapher hapoh konstituensi.
Haba kren sha ki lad pathai khubor, u Nongialam ka liang pyrshah u Bah Titos W Chyne u la ong kane ka jingleit ia kynduh ia u CEM ka dei ka sien ba nyngkong hadien 6 bnai ba ki la shimti ia ka Executive Committee.
U la ong ka daw ba ki MDC ka liang pyrshah ki leit ia kynduh ka dei na ka bynta ka jingmyntoi ki paidbah jong baroh ym tang ki MDC ka liang pyrshah.
U la iathuh ba ka mat kaba ki la ia kren ka dei halor ki kam pynroi kaba ka 1st instalment ki la dep ban pyllait ha ka EC kaba rim hynrei mynta kynsan kynsan ka don ka jingpynsangeh ban siew da ka ophis da kaba ai daw ba ka don ka tehcnical problem bad ha ka jingiakynduh ia u CEM u la kubur ba ka don ka technical problem bad Kyrmen shen kin sa lah ban pyndep ia ka.
Ki la ia kren halor ka jingslem ban siew ia ka bill, bad kyntu ia u CEM ba ki dei ban pynkloi ban siew namar hangne ngi pyntrei shuwa sa siew ia ka bill hadien.
Haba ia dei bad ka skhim na ka bynta ki khap sor bad sor ki la pynsngew sha u CEM ba un peit na ka bynta ka jingmyntoi jong ki paidbah.
U la iathuh ruh ba ki la ia kren halor bun ki wei pat ki skhim kum ka education, sport bad ki wei kiwei kiba ka mang pisa la dep mynjur hynrei haduh mynta kim shym la ioh eiei ruh kaba buh ha ka jinglyngngoh. Na ka liang u CEM u la kular ba un sa peit halor kane.
U bah Titos u la pynpaw ba ki la ia kren ruh halor ka jingwan rung ki bar jylla bad pan jingshai ba ka EC ka la leh aiu halor kane ka bynta bad na u CEM u la iathuh ba u la phah da ka shithi sha ki khlieh nongsynshar bad na la liang jong ki, ki la kyntu ba ki dei ban lum ia ka jingïalang bad iatai halor kane.
