Jowai: Mynta ka sngi ka Seiñ Raij Mukhla ka la pyndep ia ka lehñiam shad Behdeiñkhlam mynta u snem ha pung Aitnar jong ka Raij. Ia kane ka lehniam shad behdeinkhlam la sdang naduh ka 17 tarik mynta u bad la pynkut iaka ha mynta ka sngi, hapdeng ka jing ishongkun da kaba bud ryntih ruh ia ki kyndon aiñ jong ka tnat ka koit ka khiah jong ka sorkar, kaba la shim bynta tang da ki khun ba la jied ka Raij.
Kumban shu pynkynmaw ba ka Shad Behdeiñkhlam jong ka Raij Mukhla ka long ka Behdeinkhlam ba khatduh eh jong u snem ha Ri Lum Jaintia.
Mynta ka sngi la wan ban sakhilang ia kane ka Behdeinkhlam ka Sein Raij Mukhla da u MLA ka thaiñ u ma Wailadmiki Shylla. MDC ka thaiñ ma Ailad Bhoi, ma O. Lamin MDC, ma Puramon Kynjing Doloi Elaka Jowai ha jingiadonlang President, Secretary, nongialam niam ka Raij bad kiwei de.
Mynta ka sngi la sdang ia ka leñiam Behdeiñkhlam naduh ka por mynstep ha kaba la don ka jingkynting ia ki Deingkhlam ha ‘Iung Blai’ bad ka shad ka kñia da ki Waheh, katba ha ka por mynsngi la don ka jingiakynduh ki rong ha madan Slot Masi bad ka jingpynpoi ia ki Diengkhlam bad ki Rot sha wah Biar (Aitnar).
Ki khun ka Sein Raij Mukhla ki la wanrah ia ka rot ha pung Aitnar ha ryngkat ki khubor ban iada na kane ka jingpang Covid-19, da kaba kyntu ban long kiba lehkhuid, ka jingdeng bha ia ki mask bad ka pyniajngai iwei na iwei.
Na ka liang u Lyngdoh ka Seiñ Raij Mukhla u ma Wanbha Lyngdoh, haba kren u la ong ba ka Raij ka don ka jingkyrmen skhem ba lyngba ka jingpyndep ia kane ka lehñiam ba khadduh, kan wanrah ia ka bha ka miat, ka roi ka par bad khamtam eh ban beh noh shi syndon ia kane ka khlam Covid-19 na ka ri ka muluk bad na ka sla pyrthei hi baroh kawei.
