Ka Dawki Police Station ha ka jingïatreilang bad ki ASHA Workers ryngkat ka Health Department ka la pynlong ïa ka Awareness Program ban ïakhun pyrshah ïa ka jingthombor ïa ki kynthei kaba la pynlong ha Lamin Bazar, Bakur, kaba hap hapoh ka Amlarem Block, West Jaintia Hills District ha ka 19 tarik Nailar 2025, naduh ka por 10 baje mynstep.
Ia kane ka prokram la wan ban sakhi lang da ki pulit, ki doktor, ki nongtrei ka koit ka khiah, ki ASHA bad ki nongïalam shnong kiba wan ban pyni ïa ka jingïatylli ban pynneh ïa ka jingshngaiñ jong ki kynthei ha ki shnong nongkyndong bad ki jaka khappud. Ka jingïalang la pynïaid da u Sub-Inspector J.K. Majaw na Dawki Police Station.
Ha ka jingkren pdiang burom, u Officer-in-Charge jong ka Dawki Police Station u la kyntiew ïa ka jingdonkam jong ka jingïatreilang lang bad ki paidbah ban tehlakam ïa ki kam bymman ïa ki kynthei. U la pynpaw ba ka shnong Dawki kum ka shnong khappud ka iakynduh shibun ki jingeh kum ka jingwan thombor bad jingwan tuid ki nongwei ba na shabar u pud jong ka ri.
Ka ASHA Facilitator H. Swer na Mukhtapur Sub-Center ka la kren halor ka jingdonkam ban pynkhlaiñ ïa ka jingtip paidbah bad ki lad jingsumar ban tehlakam ïa ka jingshah thombor. Ka la kyntu ïa ki longïing longsem ba kin ym shu shong kli kti, hynrei kin ïa pyntip kloi lada don kino kino ki jingjia pyrshah ia ki kynthei. Hadien kata, ka Women Police Sub-Inspector R. Suchiang ka la kren halor ka jingshngaiñ jong ki kynthei, ka bynta jong ki pulit bad ka jingdonkam ban tei ia ka imlang sahlang.
U Dr. S. Khonglah na Dawki PHC u la kren halor ki lad jingsumar ha ka liang ki jingmut jingpyrkhat bad ka jingai jingsumar na ka bynta kito ki lanot.
Kiwei de kiba ai jingkren ki kynthup ia u Dr. E Khonglah na Pdengshakap PHC, ka ASHA Baiahunlang Khongsdier na Dawki kaba la pynpaw ia ka bynta jong ki ASHA kum ki nongai jingiarap ba kongsan ia ki kynthei kiba shahktah. La ioh ruh ka jingkren na u Secretary jong ka B.Lamin-Darrang Sub-Center bad Bakur Village u ma L. Manner, u ma F. Dkhar Secretary shnong Lamin, u Rangbah Shnong ka Dawki. Ia ki kyntien ai khublei la ai da Sub-Inspector ma D.B.B. Tyngkan
Kane ka Awareness Program ka la pynpaw shai ba ka jingpynneh ïa ka jingshngaiñ bad ka burom jong ki kynthei ka long kaba lah tang lada ki pulit, ki nongai jingsumar, ki ASHA bad ki nongïalam shnong ki trei lang da ka jingïatylli bad ka jingïarap hapdeng jong ki paidbah.
