Ka Sorkar Jylla mynta ka sngi ka 21 tarik Nailar 2025 ka la pynkup burom ïa 8 ngut ki ophisar bad ki briew jong ka Anti-Narcotics Task Force (ANTF) kiba la don bynta ban ïoh kurup ia u droks kaba heh tam dang shen ba la kot sha ka 4 klur tyngka ha East Jaiñtia Hills.
Ha kane ka sngi ba pynkup burom ia ki ophisar ka Anti Narcotic Task Force la ia don lang u myntri ka tnad Social Welfare, u bah Paul Lyngdoh, Director ka Dreams Mission u Bah Francis Kharshïing, SP ka tnad Anti Narcotics Task Force Giri Prasad, DIG (CID) J G Momin nalor kiwei de.
Ha kane ka sngi u Myntri ka tnad Social Welfare u Bah Paul Lyngdoh u la aiti ia ki khusnam pisa bad ki syrnod sha ki 8 ngut kiba shah pynkup burom mynta ka sngi ka 21 tarik ha ophis treikam jong ka Anti Narcotics Task Force.
Haba kren ha kane ka sngi, u myntri ka tnad Social Welfare u Bah Paul Lyngdoh u la ong kane ka dei ka sngi sah kynmaw ha kaba ki briew jong ka Anti Narcotics Task Force dang shen ki lah ioh ban kurup ia u droks ba shongdor palat saw klur tyngka.
Shuh shuh u la ong ki Pulit ka jylla ki long kiba tbit bad ki la nang khlaiñ bor na ka por sha ka por . U la ong ruh ba ki paidbah ki shu peit ia ki khubor ha ki tv bad ki mobile, ki kynthoh bun jait hynrei ki Pulit ki sngap jar bad ki trei ia ka kam bad ki Pulit ka jylla Meghalaya ki dei kawei ka kynhun Pulit kaba tbit ha ri India.
