Ka Hynniewtep Youth Council hynne ka sngi ka 21 tarik Nailar 2025 ki la wan iakynduh ia ka Joint Commissioner ka tnad labour ban dawa na ka sorkar ba kam dei ban pdiang ia ka Acknowledgement Slip kaba ki bar jylla ki pyni ha ki khyrdop talasi.
Haba kren sha ki lad pathai khubor u President ka HYC u Bah Roy Kupar Synrem u la pynpaw ba ka Seng ka lap ia ka jingdkoh ha jingpyntreikam ia ka aiñ, kaba ka sorkar ka la shna. U la ong kumban shu pynkynmaw ha u snem 2020 ka sorkar ka la shna ia ka Meghalaya Indenfication, Registration Safety Security Migrant Worker Act kaba kdew ba ki bar jylla kiba wan trei sha ka jylla ki hap ban pyntip shaei ki leit bad ki hap register ialade ki hap ai ia ki kot ki sla bad na ka liang ka labour kin peit la ki dei shisha ne em ki nong India kin hap peit lyngba ki kot ki sla jong ki nongbylla ia ki EPIC bad kiwei kiwei ban pynshisha.
Shuh shuh u la ong kaba pynlyngoh ia ka seng ha ka por ba ka seng ka leit khynra ia ki bar jylla ki don tang ka acknowledgement slip kaba pyni kiba lah apply ia kata ka registration card , hynrei kim shym la ioh.
U la ong ka seng ka wan iakynduh ia ka joint commissioner jong ka labour ban pynpaw kumno kine ki bar jylla ki ioh ban bylla , namar katkum ka ain ba la thaw da ka sorkar ha u snem 2020 ka kdew shai ba ki bar jylla kiba wan trei sha ka jylla ki hap ioh ia u Registration card.
Na ka liang ka Seng hadien ba ka la ioh ban beh krad ia ki bar jylla ka lap ba ki bar jylla ki wanrah beit tang ia ka acknowledgement slip tang ban pyni ba ki lah apply lada uta u nongbylla u dei ne um dei u nong india bad ka tnad labour kam shym la pynskhem bad kumno kine ki bar jylla ki ioh ban rung sha ka jylla.
Na ka liang ka Seng ka la bthah ia ka Joint Commissioner ba kim dei ban pdiang ia ka acknowledgement slip ha ki jaka talasi ne ki khyrdop infiltration check Gate.
Nalor kata u bah Roy kupar synrem u la pynpaw ha kine ki khyndiat sngi na ka liang ka Seng ka la lap ia ki kot ki sla kiba la shu shna thok bad pyndonkam bakla da mano re mano wat ia ki Registration Card. Ka seng ka la lap ruh ia kawei ka registration card kaba la issue bad paw ha ka 1 tarik bnai February 2026 , ia kata ka registration card la issue da u ophisar na East Jaintia Hills bad la sign da u Deputy Commissioner na West Khasi Hills District kane ka pyni ia ka jinglehthok , bad ka seng ka la lap ruh ba ka don ka jingsuba iadie ia thied ia ki Registration Card bad ki Acknowledgement slip.
Ka seng ka kyntu ia ka Joint Commissioner ka tnad labour ban shimkhia halor kane bad na ka liang ka Joint Commissioner kan sa shimkhia ia kane ka bynta bad ki tnad pulit bad ka tnad labour haba iadei bad ka jingioh acknowledgement slip ki bar jylla.
