Ha ka step jong ka 22 tarik Nailar, ha ka por kumba 2:30 baje shiteng mynstep, ka Special Cell jong ka Jowai DEF, hapoh ka jinglamkhmat jong u Jason Myrom, MPS, Additional Superintendent of Police, West Jaintia Hills, la pynlong ia ka jingkhynra (operation) ha ka thaiñ jong ka shnong Demthring, hadien ba la ioh jingtip ba thikna halor ka jingïaid jong ki ar shaka (two-wheeler) kiba la shu tuh.
Ha kane ka jingkhynra, ka kynhun pulit ka la ioh ban bat ruh ïa ka Alto K10 kaba ym don number plate. Ha ka jingïakren ki pulit bad ki briew kiba don hapoh katei kali, la pynthikna ba don lai tylli ki ki kali ar shaka, kiba la buhrieh ha ka khlaw ha katei ka thaiñ.
Ki kyrteng jong kitei ki briew kiba la ioh bat da ki pulit napoh katei ka kali ki long, Jopparson Rabon (24), na ka shnong Thangraiñ, u Meshanki Langstang (22), na Thangraiñ bad u Paulme Sungoh (21), na Nongbah Iawmusiang.
Ha kane ka jingkhynra, la ioh kurup ia ki lai tylli ki Scooty Yamaha Cygnus Ray ZR kiba don ïa ki registration number, ML05V 4471, ML05Y 5008 bad ML05AC 0799.
Ha ka jingtohkit kitei ki briew kiba la ioh kem ki la phla ba ki la tuh ïa kine ki Scooty na Laban bad Jhalupara, Shillong. Ki pulit ki la kurup ïa kitei ki Scooty bad ka kali Alto K10 kaba kitei ki briew ki la pyndonkam bad la rah sha Jowai Police Station na ka bynta ka jingtohkit kaba kham bniah.
