Ka Hynñiewtrep Border Dispute Redressal Forum (HBDRF) mynta ka sngi 25 u Nailar kila leit aiti da ka jingthoh lyngba u Border Magistrate ka WJHD u bah G.H. Passah, MCS, halor ka bynta ban dawa pynphai biang ïaka Block-I & II shapoh ka jylla Meghalaya kumba ju long ha ki por mynshwa.
Na ka liang u Chairman ka ma Chandame Sungoh haba kren sha ki lad pathai khubor ula ong ïa kane ka juh ka jingdawa jong ka seng la dep aiti da ka jingthoh haka 13 tarik u Nailar shaduh u Myntri Rangbah, sha ki Myntri Sorkar bapher bapher bad kumjuh sha ki ophisar sorkar ban pynbeit noh ïa u pud u sam uba la sahteng da ki phew snem hapdeng ka jylla Meghalaya bad Assam.
Kumba long mynta ula ong ‘ka jylla Meghalaya kala pyndem tdong palat hakhmat ka Assam, da kaba ai nuksa ba kiwei ki jylla kum ka Nagaland ki kloi ban ïakhun bad ka Assam da ka thma, hynrei ka jylla Meghalaya pat ka dang tieng bad kynrad dien’.
‘Ngi la dep ban ai da ki jingthoh bapher bapher sha ka sorkar bad mynta ngi dang ap ïa ka jubab na ka sorkar, lada ka sorkar kam shimkhia na ka liang ki paid Khasi Pnar kiba sha ha khappud Block-I & II kim banse ban shim da kiwei pat ki lad ki lynti ban ïada ïa ka khyndew ka shyiap’ ong u ma Sungoh.
Ula pyntip haka 29 tarik mynta u bnai kila ïoh ka appointment ban ïa kynduh ïa u MP ka jylla u Dr. A. J Syngkon bad na ka liang ka Forum kala dep pynkhreh nadong shadong ïa ki kot ki sla kiba donkam ban aiti sha u MP ban ïasaid na ka bynta ki shnong hapoh ka Block-I & II.
Ula ong ngim dei ban shah pynngop ha ki briew jong ka Asssam (Karbi) kiba wan pynpoi ïa ki kam pynroi hapoh kitei ki shnong khappud, kum ki nongshong shnong ka jylla Myeghalaya ki dei ban kyntait mardor ïa kino kino ki jingai kiba wan na ka Assam.
Na ka liang ka sorkar jong ka jylla ruh ula pynsngew kala don ka jingïakren ban ithuh noh ïa kitei ki shnong ha Block-I & II na ka bynta ki jingdonkam bapher bapher naduh ki kot bad ki kam pynroi, da kaba kyntu ïa ki paid khappud ban long kiba ïaishah namar naduh ki phew snem ki paid khappud kila shah lehbeiñ ha ki briew ka Assam bad kaba sah mynta ka long sa tang ban ap ïa ka jingpynbeit pud ba pura hapdeng kine ki ar jylla.
